'Navega con rumbo': 240 centros educativos galegos promoven o uso responsable de Internet
En colaboración co Colexio Profesional de Enxeñaría en Informática de Galicia o programa educativo de sensibilización sobre Internet e redes sociais chega a case 90.000 estudantes galegos.
Por Europa Press / Redacción | Santiago de Compostela | 08/12/2024 | Actualizada ás 12:53
Un total de 240 centros educativos galegos participarán durante este curso no programa 'Navega con rumbo', unha iniciativa impulsada pola Xunta en colaboración co Colexio Profesional de Enxeñaría en Informática de Galicia para favorecer o uso responsable de Internet e de redes sociais.
Por provincias, participarán 88 centros da Coruña, 36 da provincia de Lugo, 33 de Ourense e 83 da de Pontevedra. Educativo. Trátase da décimo terceira edición do programa, vixente en Galicia desde o curso 2010-11, e que se inclúe dentro das accións da Estratexia de Educación Dixital 2030.
Así mesmo, especialistas do Colexio de Enxeñaría Informática desenvolverán xornadas divulgativas dunha hora de duración nos centros, enfocadas ao alumnado de 5º e 6º de Primaria, 1º de ESO e 1º de FP Básica para "guialo cara a unha navegación segura" e evitar así que sexa vítima de condutas como o ciberacoso.
Outra das características desta iniciativa é que tamén se fai partícipe a profesorado e familias das recomendacións que eles poden aprender, ademais, este programa inclúe unha 'Guía de Boas Prácticas en Internet' dispoñible en soporte dixital e impreso nos centros.
Segundo lembrou a Xunta nunha nota de prensa, esta acción enmárcase con outras iniciativas do Goberno galego para "adiantarse aos desafíos das novas tecnoloxías". Neste sentido, detallou que este ano se lanzará un novo programa dirixido ao alumnado de Educación primaria para favorecer o "correcto uso" das novas tecnoloxías, cun investimento que supera os 2 millóns de euros.
Con todo, os estudantes tamén contan coa 'Guía de uso seguro de Internet e as redes sociais', un documento da Axencia para a Modernización Tecnolóxica de Galicia que aborda efectos e riscos.
