Novembro, o máis cálido da serie histórica en España
Galicia acadou temperaturtas superiores aos 25º.
Por Europa Press / Redacción | MADRID | 10/12/2024 | Actualizada ás 10:38
O pasado mes de novembro foi o máis cálido en España desde 1961 --inicio da serie histórica-- cunha temperatura media de 12,3ºC, segundo datos da Axencia Estatal de Meteoroloxía (AEMET) recollidos por Europa Press. Isto supón 2,8ºC máis que a media de referencia, que vai desde 1991 ata 2020. Ademais, foi o segundo máis seco do século XXI, só superado polo de 2004. De media caeron 37,5 litros por metro cadrado (l/m2).
De feito, as temperaturas medias estiveron ao redor de 3ºC por encima do normal en amplas zonas da Península e chegáronse a alcanzar valores próximos aos 4ºC por encima do normal nalgúns puntos. Á súa vez, o mes foi extremadamente cálido en ambos os arquipélago, con temperaturas máis de 2ºC por encima do normal. De acordo con AEMET, a temperatura media do mes foi a máis alta nas series de novembro de 45 estacións principais, case a metade do total. En puntos de Canarias chegáronse a superar os 33ºC e en zonas do norte de Galicia, os 25ºC.
No que respecta ás precipitacións, o mes foi moi seco. Caeu unha media de 37,5 l/m2, o que representa o 48% do valor do mes en comparación co período de referencia que vai desde 1991 a 2020. En total, foi o segundo novembro máis seco do século XXI, só superado polo de 2004, así como o sexto máis seco desde 1961.
