O PPdeG "non quere diñeiro para crear prazas públicas" en infantil porque "só lle interesa" a privada, di o PSdeG

A portavoz de asuntos sociais do PSdeG no Parlamento galego, Silvia Longueira, denunciou este martes que o PPdeG "non quere o diñeiro para crear prazas públicas" en escolas infantís de 0 a 3 anos habilitado polo Goberno porque "só lle interesa" o sector privado.

Nun comunicado remitido aos medios, a deputada socialista sostivo que detrás da renuncia por parte da Xunta da 22 millóns de euros habilitados polo Executivo estatal escóndese unha política para beneficiar ao sector privado "en detrimento do público".

A deputada do PSdeG criticou o argumento esgrimido polo presidente da Xunta de que a convocatoria non se axusta ao modelo galego. "Vouno a traducir: o PP ou quere o diñeiro para crear prazas públicas porque só lle interesa o sector privado", asegurou.

Longueira, que se achegou á escola As Mariñas, da rede autonómica, reprochoulle ao Executivo galego que "mentres decenas de familias que querían levar aos seus fillos e fillas a este centro non conseguiron praza, a Xunta do PP devolvía ao Estado 22 millóns de euros destinados precisamente á creación de prazas en escolas infantís". "Como é posible isto?", preguntouse.

Respecto dese importe, lembrou que se trata de fondos procedentes da Unión Europea que se distribúen entre as comunidades autónomas a través do Plan de Recuperación do Goberno central.

A parlamentaria socialista explicou que, na actualidade, das ao redor de 32.000 prazas en escolas infantís que existen en Galicia, 13.000 son de carácter privado, unha cifra que supera ás que ofrece a Xunta (12.000), mentres que os concellos dispoñen de 7.000.

Respecto do "modelo galego" que os populares esgrimen para defender o que en realidade é o "modelo do PP", Longueira detallou que a Xunta lles está pagando ás escolas privadas unha media de "case 310 euros por alumno ao mes". Con todo, ás municipais só abónalles "pouco máis de 90 euros". "O resto dos custos, que os solucionen os concellos se poden", criticou.

Silvia Longueira lamentou que "cando o PP di que garante a gratuidade universal das escolas infantís, o que fai en realidade é ir engordando o sector privado e restándolle peso a público". O obxectivo, "como sempre", é "ir cara a un sistema no que só poderán ir ás escolas infantís as nenas e nenos con familias que o poidan pagar", dixo ante o feito de que as prazas públicas consolidan un dereito e os medios para sostelo, mentres que as privadas non.

Ante a porta da escola coruñesa, situada na rúa Orillamar, reprochou tamén que a principios de setembro a conselleira de Política Social, Fabiola García, acudise a ese centro a "vender as bondades do seu modelo". "Pero fíxoo antes de que empezasen as clases, non se fose a atopar coas nais e os pais dos nenos e nenas que quedaron sen praza nesa escola pública", manifestou.

FABOLIA GARCÍA

A conselleira de Política Social e Igualdade, Fabiola García, insistiu en que a Xunta renunciou a 22 millóns de euros para a creación de prazas en escolas infantís porque "non respondían as necesidades de Galicia".

En declaracións difundidas pola Xunta durante unha visita a unha escola infantil de Elviña, a conselleira responsabilizou aos "estritos criterios marcados polo Goberno" da decisión de devolver esta partida.

Segundo García, a Xunta advertiu "fai tres anos" que estes fondos "serían unha oportunidade perdida" porque "non se poden utilizar" para o programa de gratuidade en escolas infantís privadas sufragado pola Administración autonómica.

Durante a visita, a conselleira avanzou que a Xunta acometerá no ano 2025 a reforma integral da escola infantil pública de Elviña, na cidade da Coruña, a través dun investimento de 300.000 euros.

Avanzouno este martes a conselleira de Política Social e Igualdade, Fabiola García, durante a súa visita ao centro do barrio herculino, segundo recolle un comunicado da Xunta.

A actuación contempla a mellora da envolvente térmica do centro, que conta cun centenar de nenos e nenas de entre 0 e 3 anos. Durante a visita, a conselleira repasou o investimento de "máis de 3 millóns de euros" feita pola Administración autonómica en obras de mellora da rede pública de escolas infantís.