Indra e Inaer gáñanlle a partida a Boeing e Airbus para a construción de drons en Rozas
A Xunta aumenta de 25 a 40 millóns o seu investimento para facer de Galicia o “centro” da fabricación e comercialización de avións non tripulados do Estado. A Xunta anuncia que en Rozas se construirá un helicóptero, un avión e un vehículo mariño non tripulado.
Por Galicia Confidencial | Compostela | 25/02/2016 | Actualizada ás 15:12
As multinacionais española Indra e a australiana Inaer serán as encargadas, finalmente, de poñer en marcha o parque tecnolóxico de avións non tripulados de Galicia no aeródromo de Rozas. Estas dúas empresas, a primeira tecnolóxica e a segunda aeronáutica, impuxéronse a Boeing e Airbus para a construción e comercialización de drons desde Lugo.
O presidente da Xunta, Alberto Núñez Feijóo, e o conselleiro de Economía, Francisco Conde, presentaron, na rolda de prensa posterior ao Consello da Xunta este novo acordo que supón o investimento de 115 millóns de euros, 75 por parte de Indra e Inaer, e 40 por parte do Goberno galego.
De feito, a Xunta aumentou nun 60% o orzamento inicial, que era de 25 millóns. Un aumento que o conselleiro explicou porque co este acordo se “amplía o impacto económico” que para Galicia suporá este parque tecnolóxico e que suporá a creación de 600 postos de traballo directos e indirectos. Sen embargo, Conde non soubo especificar en diñeiro o retorno que terá a inversión que poñen todos os galegos.
O único que deixou claro é que na oferta final, estas dúas empresas, se comprometen a trasladar a Galicia a actividade de seis empresas que operan, actualmente, noutros puntos de España, entre elas, Acuabens, S4A Solutions for aviation ou Tecnam Aviation.
Ademais, con este acordo, a Xunta e o consorcio entre Indra e Inaer axudarán aos plans industriais de 18 empresas, o 70% delas galegas e firmarán contratos con 14 centros de coñecemento, nos que hai parques empresariais e as tres universidades galegas. Tamén se creará un catálogo de produtos galegos e o desenvolvemento de tecnoloxías transversais de alto impacto noutros sectores.
Construción de varios prototipos
O acordo tamén recolle a posta en marcha dun parque industrial especializado en aeronáutica en Rozas. Un parque no que está prevista a construción, inicialmente, de tres prototipos; un helicóptero non tripulado para a loita contra os lumes, un avión non tripulado e un vehículo mariño non tripulado. Para iso, en Rozas crearanse edificios adaptados, centros tecnolóxicos, unha unidade de instrución de pilotos e un novo angar.
Os modelos construídos en Rozas servirán para a prevención de lumes e do patrimonio cultural, a xestión do territorio, a loita contra o furtivismo, a xestión da biomasa, salvamento marítimo e vixiancia costeira e xestión de fluxos turístico.
“Creamos un polo industrial e tecnolóxico no interior de Lugo para que Galicia sexa unha rexión líder na fabricación e distribución de avións non tripulados”, suliñou Feijóo. Pola súa banda, Conde destacou que o obxectivo é atraer inversións e liderar a comercialización de drons a nivel mundial.
INAER é unha multinacional australiana líder en misións con avións non tripulados, mentres que Indra é outra multinacional española, líder en alta tecnoloxía. “Precisamente iso foi o que valoramos para darlle o contrato a eles”, dixo Conde. Entre as dúas empresas suman case 9.000 millóns de euros de facturación e 48.000 empregos.
