Por Galicia Confidencial | Santiago de Compostela | 23/03/2016 | Actualizada ás 15:30
O 2 de Abril haberá reunión do Comité de Dirección do PPdeG. Daquela, e só daquela, Alberto Nuñez Feijóo desvelará ao mundo o seu futuro político. “A partir de aí todas as respostas serán respondidas”, declarou este mércores o mandatario na rolda de prensa tras o Consello da Xunta.
O mandatario volveu esquivar hoxe as numerosas cuestións sobre se repetirá como candidato á Xunta e na presidencia do PPdeG. Incluídas varias sobre un adianto electoral.
Postos a interpretar os silencio do político conservador, isto é significativo. Hai unhas semanas Feijóo desbotaba abertamente tal adianto, sacando peito de goberno estábel. Neste tempo algo cambiou na súa estratexia, polo que unhas eleccións en primavera parecen máis posíbeis.
Feijóo limitouse a sinalar que “o próximo sábado 2 de abril imos facer o último Comité de Dirección (...) e ese é o último día para presentarse a presidente do PPdeG”.
Significa iso que, dado que ninguén se vai presentar, Feijóo terá vía libre para suxerir un sucesor co seu dedo? Será ese sucesor o candidato a presidencia da Xunta? Haberá que esperar pouco máis dunha semana para coñecer as respostas que marcarán os tempos da política galega.
Política galega que pode estar marcada por vez primeira por un PP que lle fai as beiras ao PSdeG. O presidente da Xunta de Galicia non quixo andar “dificultades extremas” socialistas. Polo contrario, gabou o papel do PSdeG na democracia galega e ante unha “situación que se describe por si mesma”, desexoulle que “reconstrúan os seus liderados” canto antes.
De repetirse nunhas eleccións galegos os resultados do 20D, o PP necesitaría dos votos do PSOE ou Ciudadanos para manter o goberno.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.