O Supremo anula a autorización de Reganosa
O alto tribunal sostén que o permiso carecía de "cobertura urbanística", polo que a empresa terá que tramitar unha nova autorización.
Por Galicia Confidencial | Santiago | 04/04/2016 | Actualizada ás 18:13
O Tribunal Supremo dálle un pau a Reganosa ao anular a autorización administrativa previa, logo de estimar un recurso contencioso-administrativo interposto pola plataforma de veciños O Cruceiro de Mehá e outras entidades. Deste xeito, anúlase a resolución de 2002 da Dirección General de Política Energética do Goberno central, que outorgou autorización administrativa previa para a ainstalación dunha planta de recepción, almacenamento e regasificación de gas natural licuado en Mugardos.
A sentenza do Tribunal Supremo deixa ademais sen efecto a sentenza do Tribunal Superior de Justicia de Madrid que en 2013 ratificou a legalidade da planta.
O alto tribunal anula a autorización administrativa por terse concedido nun momento no que o plan de ordenamento urbanístico de Mugardos, de 2003, non permitía a instalación nese lugar dunha instalación de hidrocarburos.
Deste xeito, Reganosa deberá tramitar de novo a autorización administrativa. A empresa xa anunciou que traballará para resolver este contratempo, que considera unha simple "cuestión de forma e non de fondo" e agárrase a que a sentenza desestimou dous dos tres motivos de reclamación, os cales era: un relacionado coas condicións técnicas e de seguridade da planta, que foi desestimado, outro polo impacto ambiental, tamén desestimado, e un último polo emprazamento, que foi o que levou a esta anulación.
