Empresa pública tala un dos poucos bosques inundábeis de Galicia

A Sociedade Galega de Historia Natural (SGHN) denunciou de urxencia ante Dirección Xeral de Conservación da Natureza unha “ampla tala” nas Brañas de Laíño,  un dos pouquísimos bosques inundábeis de Galicia. Máis de media hectárea de bosque aluvial ao carón das zonas protexidas "Sistema fluvial Ulla-Deza" e "Esteiro do Ulla", pero fóra dos seus límites no Concello de Dodro.

Os ecoloxistas indican que aínda non teñen resposta da Xunta. Ademais, aseguran que houbo máis talas “moito máis amplas” ao nordeste desa primeira zona, a ambos lados da estrada AC-305 entre Tallós e Muronovo, con “afeccións moi importantes” sobre varias zonas tamén protexidas.

A Sociedade Galega de Historia Natural reclama a Xunta que ordene cautelarmente a paralización inmediata de ditas talas e identifique aos responsables das mesmas. Tamén queren saber se o Goberno Galego as autorizou e, no seu caso, os motivos.

Quen realizou a tala? Segundo o grupo político local Unidade Veciñal de Dodro (UVD) foi a empresa pública Tragsa. Quen a ordenou? Pois quen ten competencia nesa zona inundábel, o departamento de Costas do Estado.

UVD relata que os operarios de Tragsa “en principio tiñan proxectado facer unha limpeza na área consistente en corta de salgueiros e desbrozar o resto, deixando a pista cas arbores” pero “tiveron unha visita do alcalde que lles ordenou unha corta total, das arbores da pista tamén, e eles van facer o que lles ordenan”.  Ante estas acusacións, o alcalde de Dodro, polo de agora, negou ser o responsábel da tala. O asunto discutirase no próximo pleno local.