Educación replica á CIG que a inspección fai "o seu traballo" preguntando aos centros polo referendo de alumnos

A Consellería de Cultura, Educación e Ordenación Universitaria replicou á CIG-Ensino que a inspección "está a desenvolver o seu traballo" ao preguntar aos centros educativos polo referendo de alumnos contra a Lomce impulsado polo sindicato Erguer!.

En concreto, o sindicato acusou á Xunta de emprender "caza de bruxas" nos centros remitindo cuestionarios sobre a citada iniciativa dos alumnos, cun obxectivo "intimidatorio".

Educación, non obstante, defendeu o traballo da inspección para "ter coñecemento dunha acción non prevista e, polo tanto, descoñecida para os inspectores", actuando "dentro das súas competencias" para "garantir o bo funcionamento dos centros".

Por iso, considerou que se trata dunha solicitude de información e que se trata de algo "rutinario e habitual ante calquera feito que se descoñeza", velando polos intereses do alumnado.