A empresa coruñesa Gairesa recibe o Premio á Excelencia Empresarial Química de Galicia 2016

A empresa Gairesa recibiu o Premio á Excelencia Empresarial Química de Galicia 2016, galardón que cada ano outorga o Colexio Oficial de Químicos de Galicia, que celebrou o seu encontro anual este sábado en Chantada (Lugo).

O acto de entrega do premio tivo lugar na adega Vía Romana. Alí, ademais de homenaxear a Gairesa, o Colexio Oficial de Químicos tamén entregou distincións aos químicos con 25 anos de pertenza á institución colexial.

O vicedecano do Colexio, Juan Mogin, enxalzou a empresa coruñesa por "ser unha compañía que pensa na química e colabora cos químicos", xa que, como recordou, a maioría dos seus empregados son tituladas neste ámbito.

Gairesa, afincada en Valdoviño (A Coruña) e nacida en 1980, traballa "intensamente na innovación e desenvolvemento dun amplo abano de formulacións de sistemas plásticos líquidos" e pervive nun sector onde "hoxe en día practicamente só quedan as grandes multinacionais".