O primeiro anuncio en galego cumpre 140 anos

A publicidade en galego acaba de facer 140 anos. O 5 de novembro de 1876 publicábase no semanario 'O Tío Marcos d'a Portela' o primeiro anuncio na nosa lingua. Ofertaba 'Máquinas pra coser d'a compañía fabril Singer'.

De feito, o galego empregouse con total naturalidade para vender máquinas de fabricación alemá, algo que é mesmo hoxe difícil de ver. “Máquinas pra coser pra endustriales e familias”, leíase neste anuncio, no que suliñaba que se podían vender “a prazos a catorce reás por semana. Sin aumento ningun n'os precios, dez por cento de rebaixa o contado”.

Precisamente, coincidindo con este feito, o departamento de Cultura e Lingua da Deputación de Pontevedra destacou “o esforzo que aínda a día de hoxe é imprescindible” para normalizar a lingua galega no eido do comercio e da empresa. Neste sentido, durante o ano 2016 e a través da liña de dinamización do galego, a Deputación colabora coas campañas con varias entidades para difundir o galego entre a clientela e os seus asociados.

Entre estas entidades están a Asociación Galega de Empresas de Enxeñería Civil e Infraestruturas de Vigo, a Federación de Comerciantes Industriais do Morrazo, a Federación Galega de Parques Empresariais, a Asociación de Comerciantes e Industriais do Porriño, a Asociación de Empresarios de Redondela, a Rede Galega de Empresas ou o Centro Comercial Aberto de Vilagarcía.