A entrada á Catedral de Santiago seguirá sendo gratis
Barrio rexeita cobrar por entrar ao templo e fai un chamamento aos que poden axudar a mantela por outras vías.
Por E.P. | SANTIAGO DE COMPOSTELA | 12/12/2016 | Actualizada ás 13:38
O arcebispo de Santiago, Julián Barrio, reafirmouse en que a Catedral de Santiago "presta servizo" ao peregrino, polo que "non sería o máis axeitado" cobrar pola entrada.
Por iso, nun almorzo informativo organizado polo 'Fórum Europa. Tribuna Galicia', apelou a buscar outras vías para poder manter o templo en boas condicións, xa que preservar o patrimonio é custoso.
Así as cousas, fixo "un chamamento" a todos os que poidan a axudar a "manter" unha Catedral, cuxa beleza enxalzou, aínda que quizais pola súa "proximidade", dixo, non sempre é tan "admirada" como corresponde.
Dito isto, asegurou que "comprende" que outros bispos cos seus conselleiros decidiran nas súas respectivas dioceses que "é necesario cobrar". "O patrimonio hai que mantelo e o custo non é pequeno, estámolo a ver coa nosa rehabilitación", reflexionou.
OBRAS LISTAS A FINAIS DE 2019
Con respecto ás obras da Catedral, confía en que no Ano Santo 2021 se poida admirar o templo sen estadas.
"Segundo comentou o Cabido e o director da Fundación Catedral, é moi posible que poidamos telas a finais de 2019", subliñou.
