A regueifa colle folgos en Galicia da man dos máis novos

A regueifa segue viva, ou, cando menos, nalgúns centros escolares. O alumnado da materia RIOV (“Regueifa e improvisación oral en verso”) do IES Marco do Camballón acaba de presentar a “I Festa de Repente: A regueifa está na rúa”  que  terá lugar o día 21 de decembro no bar Txapela , en Vila de Cruces

A organización deste evento corre a cargo de  trece alumnas e alumnos de segundo da ESO. O motivo da festa é promover a regueifa por toda Galicia xa que  esta actividade, que perdeu os mellores regueifeiros nos últimos anos, está a vivr unha época de revitalización grazas á chegada dunha nova xeración de repentistas. 

Con este evento o alumnado da materia RIOV de segundo da ESO quere que “esta actividade rexurda xa que  ao regueifar estanse desenvolvendo habilidades lingüísticas, comunicativas e de relación social, e educación en valores e autoxestión, ademais de poder converterse nunha actividade de entretemento e diversión”.

“Somos 13 alumnos e alumnas de segundo da ESO. Estamos aprendendo a improvisar cantando en verso  e cada vez somos máis os rapaces e rapazas que nos animamos”, suliñan nun comunicado. Tamén lembran que realizan esta festa para animar a xente a improvisar  e tamén  para “divertirse un pouco".

A regueifa ou improvisación oral en verso consiste en crear unha estrofa de catro versos octosílabos, cantando, co propósito de que rime o segundo co cuarto.

A iniciativa forma parte do Proxecto “ REGUEIFESTA”, unha iniciativa para promover a improvisación oral en verso no mundo do insino impulsada polo IES Marco do Camballón de Vila de Cruces e do  IES Maximino Romero de Lema de Baio. O Proxecto Regueifesta  ten como un dos seus obxectibas educativos a educación en valores e a autoxestión. 

Adiante coa improvisación!