Úrsula Heinze aborda o mundo da depresión a través do diálogo entre unha paciente e o seu psiquiatra

Tras publicar en 2015 unha crónica da súa experiencia como interna nun psiquiátrico, a escritora Úrsula Heinze de Lorenzo edita agora 'Pon un psiquiatra na túa vida... e xa verás' (Alvarellos), no que aborda o mundo da depresión a través do diálogo entre unha paciente e o seu psiquiatra.

Nesta novela, Sally, a protagonista, fala directamente da súa propia depresión a través do diálogo que mantén co seu novo psiquiatra en sesións mensuais durante dous anos, nas que van aflorando problemas como a vellez, a idea da morte, a sexualidade ou a relación cos demais.

A obra presentarase en Santiago de Compostela este xoves, día 16, ás 20,00 horas nun acto no café Airas Nunes no que a autora estará acompañada polo editor Henrique Alvarellos e polo filólogo Xesús Ferro Ruibal.