Esteban García Vilasánchez releva a José Manuel Revuelta na presidencia de Navantia
O Consello de SEPI nomeou presidente de Navantia a Esteban García Vilasánchez, que conta cunha ampla experiencia no sector naval e era anteriormente o director de Programas da compañía, informou a sociedade.
MADRID | 07/04/2017 | Actualizada ás 12:03 por EUROPA PRESS
O Consello de SEPI nomeou presidente de Navantia a Esteban García Vilasánchez, que conta cunha ampla experiencia no sector naval e era anteriormente o director de Programas da compañía, informou a sociedade.
García Vilasánchez releva no cargo a José Manuel Revuelta, quen solicitara a súa substitución á presidenta de SEPI, Pilar Platero, ao considerar que pechara unha etapa na que se conseguiron novos contratos e promovido un plan de transformación que agora debe consolidarse co Plan Estratéxico para a compañía.
O novo presidente de Navantia iniciou a súa carreira profesional en 1990 na área 'Offshore' do grupo, alcanzando en 2004 o posto de director de Reparacións de Ferrol-Fene.
En 2009 foi nomeado director do estaleiro de construción naval de Ferrol-Fene intervindo no programa de fragatas para Noruega, as fragatas F100 e o LHD Juan Carlos I para a Armada Española e o programa LHD para a Armada Australiana. En 2012 foi nomeado director Industrial de Navantia e posteriormente director de Programas, cargo que ostentou ata a actualidade.
Á fronte de Navantia, García Vilasánchez deberá abordar o novo Plan Estratéxico para a empresa que está a ser impulsado por SEPI "coa finalidade de reforzar a eficiencia e sustentabilidade da compañía, potenciando o seu impacto sobre as áreas económicas onde se sitúan os seus estaleiros", sinalou o holding público.
