A Sectorial TIC da CRUE celebra en Santiago a súa asemblea e unha xornada sobre a seguridade da información

A Sectorial TIC da Conferencia de Reitores de Universidades Españolas (CRUE) reunirase na Universidade de Santiago (USC) para celebrar a súa asemblea e unhas xornadas sobre a seguridade da información nas universidades.

Esta sectorial, segundo explica a USC, ten como cometido o estudo das necesidades e aplicacións destas tecnoloxías na xestión, a docencia e a investigación, propondo actuacións e proxectos conxuntos.

As sesións terán lugar na Escola Técnica Superior de Enxeñaría, onde este xoves ás 16,00 horas empezará a súa asemblea, á que asistirá o reitor compostelán, Juan Viaño, e na que intervirá o seu presidente, Juan Gómez Ortega, reitor da Universidade de Xaén.

A xornada técnica comezará pola mañá e nela participarán responsables de servizos dixitais, de informática e TIC das universidades españolas, que tratarán cuestións relacionadas co estado actual das tecnoloxías da comunicación á vez que presentarán iniciativas de éxito implementadas co fin de aproveitar sinerxías.