Galicia ten as áreas urbanas con maior diversidade de ecosistemas costeiros en España
Zonas das Rías Baixas e Altas, de Murcia, do Golfo de Cádiz e do Mar Cantábrico mostran os máximos valores de diversidade de ecosistemas nas zonas urbanas do litoral en España. Representan o 11% das áreas costeiras urbanizadas, segundo un estudo do CEI·MAR.
Por Alberto Quian | Santiago de Compostela | 18/05/2017 | Actualizada ás 15:01
Áreas urbanas do litoral galego mostran os maiores índices de diversidade de ecosistemas entre todas as zonas urbanizadas da costa de España. Así o salienta un estudo do CEI·MAR, o Campus de Excelencia Internacional del Mar, en Cádiz, que se publica na revista Cities - The International Journal of Urban Policy and Planning (volume 68, agosto 2017, páxinas 8–17).
Os investigadores do CEI·MAR analizaron a relación entre o desenvolvemento urbano e os ecosistemas costeiros en todo o litoral de España, onde o 80% das zonas urbanas están asociadas con máis dun tipo de ecosistema costeiro.
"En canto á diversidade de ecosistemas, o 11% das áreas urbanas obtivo os máximos valores de diversidade (nas rexións de Murcia, Golfo de Cádiz, Galicia e o Mar Cantábrico)", conclúen os autores da investigación, que consideran que "estas áreas urbanas deben enfocar os procesos de GIZC [Gestión Integrada de Zonas Costeras] cara á conservación dos ecosistemas e a mellora dos seus servizos".
Os científicos salientan que o 80% das zonas urbanas costeiras do Estado e o 90% da súa poboación están relacionados con algún tipo de ecosistema. En concreto, o 41% son zonas urbanas que mostran unha diversidade de ecosistemas media e o 11% son zonas urbanas costeiras cunha alta diversidade.
No caso de Galicia, o mapa deseñado polos científicos sitúa esas zonas urbanas do noso litoral con alta diversidade de ecosistemas nas Rías Baixas, na zona máis ao sur, na contorna da ría de Vigo, e tamén nas Rías Altas, na contorna das rías de Ferrol e Cedeira.
O litoral español ten unha superficie de 11.038 km2, o que representa o 2% da superficie total do Estado. Esta unidade ten unha anchura que varía de centos de metros a 10 km. Existen 623 entidades urbanas con 11.667.554 habitantes, que representan o 28% da poboación urbana, o cal "conduce a cambios significativos nos usos da terra que teñen un impacto negativo nos ecosistemas costeiros", aportan os científicos no seu estudo, titulado 'Relationships between coastal urbanization and ecosystems in Spain'.
