As primarias do PSOE en Galicia, no aire por falta de documentación
O bando de Pedro Sánchez denuncia que o aparto non remitiu as acreditacións dos seus interventores. Ameazan con non deixar constituír os 188 centros de votación previstos.
Por E.P. | SANTIAGO DE COMPOSTELA | 20/05/2017 | Actualizada ás 09:35
Partidarios de Pedro Sánchez denuncian que este venres Ferraz remitiu á provincia de Pontevedra o censo de interventores de cara ás primarias do domingo sen as credenciais para que os que apoian ao ex secretario xeral do PSOE exerzan o seu labor.
Segundo fontes consultadas por Europa Press, partidarios de Pedro Sánchez puxéronse en contacto coa xestora estatal do PSOE para facerlles chegar a súa queixa sen que polo momento recibisen resposta.
Ademais, advirten de que, no caso de que non se liquide esta situación, non permitirán a constitución de ningunha das mesas da provincia.
Un total de 10.394 militantes socialistas en Galicia están chamados a participar o domingo nas primarias nas que se elixirá a persoa que dirixirá o partido durante os próximos anos. Para iso, poderán acudir a algún dos 188 centros habilitados para votar.
En Pontevedra están chamados ao voto este domingo un total de 2.844 socialistas, que poderán exercer o seu dereito no medio centenar de mesas electorais.
