Unha balea azul dentro da ría?

O gran animal aparece nadando fronte a entrada da Ría de Muros e Noia. En dúas ocasións sae á superficie e pode apreciarse perfectamente o seu enorme tamaño, o que suscita comentarios por parte dos mariñeiros que filman.

O CEMMA tentou poñerse en contacto cos autores para determinar se efectivamente se trata dunha balea azul, o maior animal que nunca viviu no Planeta. Os seus expertos din que necesitan ver ou que lle describan a aleta para poder estar máis seguros.

“De confirmalo é un fito histórico para o mar do noso país!”, exclaman dende o CEMMA, pois non hai ningún rexistro dunha balea azul tan preto das costas galegas, tan só dun cadáver varado.