Un can policía que traballou no accidente de tren en Angrois ‘xubílase’ cunha familia en Galicia

Brus é un can policía especializado na recuperación de restos humanos., Entre outros operativos, traballou no do accidente do Alvia en Santiago de Compostela. Agora 'xubílase' cunha familia en Galicia.

A través da asociación Heroes de 4 Patas, unha familia de Salcedo (Pontevedra) adoptou ao animal tras finalizar a súa vida activa despois de dez anos de servizo.

A Policía Nacional conta actualmente con 452 cans —17 deles en Galicia— e 218 axentes responsables do seu adestramento e traballo policial. Os guías caninos están formados na detección de explosivos, drogas, acelerantes do lume, billetes de curso legal, persoas ocultas, labores de salvamento e rescate e procura e localización de restos humanos, tamén no medio acuático.

En 1947 creouse a Escola de Adestramento Canino da Policía, nun primeiro momento para a detección de droga, á que se foron sumando outras especialidades. En 1994 empezouse a adestrar a cans en rescate e salvamento de persoas entre cascallos e grandes superficies e en 2009 empezouse a adestrar a recuperación de restos humanos.

Heroes de 4 Patas é unha organización sen ánimo de lucro que persegue dar visibilidade ao labor de cans de traballo empregados por administracións públicas ou entidades privadas e ofrecer "unha retirada digna e de calidade" aos exemplares que abandonan o servizo por idade ou perda de capacidades, mediante a creación dunha rede de familias adoptantes.