En Marea rexistra máis de 120 enmendas á lei de fomento empresarial, que só servirá para "legalizar o espolio"

En Marea rexistrou un total de 123 enmendas á proposición de lei de fomento da actividade empresarial en Galicia, un texto normativo que só servirá, ao seu xuízo, para "legalizar os roubos e o espolio" das grandes empresas.

Diso deu conta en rolda de prensa o viceportavoz parlamentario de En Marea, Antón Sánchez, quen incidiu en que esta norma pretende ser "a coartada para legalizar a depredación" do noso territorio por parte de grandes compañías.

"É unha infame concesión colonial que entrega ás multinacionais a ganancia mentres deixa os impactos medioambientais en Galicia", enfatizou Sánchez, dende o convencimiento de que esta forma de lexislar é "propia de ladróns de luva branca".

É por isto que, pese a que "previsiblemente" o PP pasará "o rolo" e non aceptará as súas propostas, a formación rupturista enmendou o proxecto legal para "rectificar" a "desprotección" do patrimonio cultural e medioambiental.

Tamén pretende que non se recorte o tempo de exposición pública nas expropiacións, mentres pon o foco na necesidade de apostar polas renovables e de que se prime a pequena produción.

"Temos alternativas", recalcou o tamén líder de Anova, sen deixar de facer fincapé na necesidade de regular adecuadamente o eólico, para que deixe máis beneficios públicos, e a minería, para controlar os seus impactos e que a reconstrución unha vez finalizada a extracción non corra a cargo do erario público.

"CORRUPCIÓN LEGALIZADA"

Fronte a ese "modelo colonial" que propugna o PP, Antón Sánchez apelou á movilización cidadá para frear este texto, que constitúe unha "evidencia" de que existe a "corrupción legalizada".

Tras indicar que xa se creou unha plataforma contra "a depredación de Galicia", con sindicatos e asociacións agrarias e ecologistas, pediu aos concellos que "se movan tamén" nese sentido.