Novo paso para a candidatura das Illas Atlánticas a Patrimonio da Humanidade

A Xunta de Galicia confirmou este venres que o Consello de Patrimonio Histórico, reunido na Rioxa, aprobou a inclusión de Cíes-Parque Nacional Illas Atlánticas na denominada Lista Indicativa, onde figuran as aspirantes a ser candidaturas a Patrimonio da Humanidade da UNESCO. Así o explicou o conselleiro de Cultura, Educación e Ordenación Universitaria, Román Rodríguez, quen sinalou que esta decisión é un "paso fundamental" que "cambia absolutamente o escenario" e que pon o proxecto impulsado pola Xunta "no pelotón de saída". "As Cíes e o conxunto do Parque Nacional inician un camiño que xa non ten retorno", indicou.

O conselleiro fixo tamén mención ao enfrontamento co goberno local de Vigo e o alcalde, Abel Caballero, que impulsan outra candidatura para que as Illas Cíes (só este arquipélago) sexan designadas Patrimonio da Humanidade. Unha iniciativa que, segundo lembrou o propio Román Rodríguez, aínda non foi remitida ao Ministerio de Cultura.

Román Rodríguez comparou esta situación coa fábula da cigarra e a formiga, e proclamou que "mentres a cigarra (o alcalde) se pasou o verán de festa en festa, a formiga (a Xunta) cun traballo constante, conseguiu resultados".

O titular de Cultura da Xunta lamentou o "ataque constante" do rexedor olívico á candidatura promovida desde o Goberno galego, un ataque que supuxo un "constante menosprezo" a outras localidades e illas integradas no Parque Nacional, nunha dinámica "salpicada de medias verdades, cando non mentiras".

CHAMAMENTO Á INTEGRACIÓN

Román Rodríguez fixo un chamamento ao goberno local vigués para que se integren na candidatura promovida pola Xunta, que vai seguir "traballando coa sociedade civil e coa Universidade". "De non querer integrarse, pedímoslle que siga facendo promoción das Cíes, porque tamén se fai do conxunto (do Parque Nacional)", engadiu, aínda que matizou que manter a candidatura de Cíes "non ten viabilidade nin sentido".

O conselleiro insistiu en xustificar a presentación do Parque Nacional no seu conxunto porque "é a única posibilidade de que a candidatura teña viabilidade" e "non se dana a ninguén". "Nisto están catro concellos, tres alcaldes a favor e só un situado de modo radicalmente contrario", destacou.

Na mesma liña, o vicepresidente da Xunta, Alfonso Rueda, pediu "que impere o sentido común" porque a designación como Patrimonio da Humanidade é "un obxectivo que interesa a todos" e "o protagonismo das Cíes é indiscutible".

Así, Rueda pediu que esta iniciativa "non sexa un elemento de confrontación", porque se Caballero elixe esa vía "seguirase equivocando". Por iso, tendeu "a man" ao goberno vigués para que se some ao proxecto e ao "traballo calado" da Xunta, que "deu os seus froitos".

PRAZOS

A inclusión de Cíes-Parque Nacional Illas Atlánticas na Lista Indicativa do Ministerio é o primeiro paso dun proceso que pode alongarse durante anos. Aínda que, neste caso, existe a vantaxe de que este espazo conta cun órgano xestor e figuras de protección (requisitos que expón a UNESCO), aínda poderían pasar anos antes de que se faga realidade a designación como Patrimonio da Humanidade.

A candidatura, xunto coas outras que se incluíron na Lista Indicativa, serán remitidas a finais de ano á UNESCO para a súa validación. A partir de aí, cada iniciativa debe permanecer en 'caseta by' nesa lista polo menos un ano, antes de que os técnicos da organización internacional realicen as comprobacións, contactos e visitas pertinentes.

O procedemento para chegar á Lista de Patrimonio Mundial, segundo explica o propio Ministerio, alóngase como mínimo tres anos, e o propio conselleiro admitiu que poden ser "4,5 ou 6", tendo en conta que España só pode presentar unha candidatura cada ano para que entre esa lista.