(AV)Máis dun centenar de incendios continúan afectando a Galicia e hai oito feridos por queimaduras

Galicia continúa afectada na mañá deste luns por 105 incendios, dos que 67 permanecen activos e, concretamente, 15 están en situación 2 por risco para a poboación. Como consecuencia desta vaga de lumes, os centros hospitalarios atenderon a varias persoas por intoxicación por fume e a oito por queimaduras.

Así o informou o presidente da Xunta, Alberto Núñez Feijóo, na rolda de prensa posterior ao Consello da Xunta convocado de forma extraordinaria para analizar a situación dos incendios forestais.

Segundo explicou o presidente galego, os incendios con máis risco para vivendas e poboación, os de nivel 2, son seis na provincia de Pontevedra, cinco na de Lugo e catro na de Ourense. A situación de risco obrigou a suspender as clases en 21 colexios (20 deles en Pontevedra) e a pechar cinco centros de día, tres escolas infantís e dúas casas niño.

Os servizos sanitarios atenderon durante a noite a multitude de persoas afectadas por inhalación de fume, así como a oito persoas por queimaduras, das cales tres permanecen ingresadas.

Tras lembrar que o presidente do Goberno, Mariano Rajoy, desprazarase esta mañá a Galicia para facer seguimento da situación, Núñez Feijóo informou de que se decretaron tres días de loito oficial polo falecemento de tres persoas por mor dos lumes. Ao mesmo tempo, avanzou que a conselleira de Medio Rural, Ángeles Vázquez, pediu comparecer na sesión do Pleno do Parlamento deste martes para dar conta da situación.

(Haberá ampliación)