(AM)Detido en Vigo por causar un incendio por unha imprudencia na súa leira o domingo nos Blancos (Ourense)

A Garda Civil detivo a un home en Vigo por supostamente ser o causante dun incendio por unha imprudencia o pasado domingo nos Blancos (Ourense).

Diso informou o ministro do Interior, Juan Ignacio Zoido, a través da súa conta persoal na rede social Twitter. Fontes policiais sinalaron que a detención se produciu sobre as 8,30 horas deste mércores.

O detido plantou lume nunha leira familiar "de forma incontrolada", sobre as 13,30 horas do domingo día 15. Ardeu unha hectárea de superficie, a metade dela arborada, a 300 metros das casas, segundo apuntan as mesmas fontes.

De acordo cos datos que trasladou a Xunta, que fala dunha "actividade incendiaria" e ata "homicida", o pasado domingo a comunidade rexistrou 134 incendios.

Arderon en toda Galicia máis dunha vintena de casas, dúas deshabitadas e outras tres baleiras ou deshabitadas na provincia ourensá.