O xulgado de Vigo autoriza o enterramento das dúas mulleres que faleceron nun incendio de Nigrán

O xulgado de instrución de Vigo autorizou este mércores o enterramento das dúas mulleres falecidas o pasado domingo no incendio rexistrado na zona de Chandebrito, en Nigrán (Pontevedra), tras concluírse os trámites forenses, segundo confirmaron fontes xudiciais.

Estas dúas mulleres, de 86 e 78 anos de idade, perderon a vida na noite do domingo cando trataban de escapar das lapas, xunto cunha veciña, nunha furgoneta. Os seus corpos calcinados apareceron no interior do vehículo, nunha pista entre Chandebrito e Camos.

Por outra banda, o xulgado vigués xa autorizara este martes a inhumación do veciño da parroquia viguesa de San Andrés de Comesaña, de 70 anos de idade, que tamén faleceu o domingo tras caerse desde un muro, desde onde estaba a axudar a loitar contra as lapas.

Do mesmo xeito, o xulgado de Ribadavia autorizou tamén o martes o enterramento un veciño de Abelenda, en Carballeda de Avia, que perdeu a vida na noite do domingo cando trataba de salvar aos seus animais do lume.