Os lumes da fin de semana arrasaron 35.500 hectáreas, máis que 2014, 2015 e 2016 xuntos
A esta superficie hai que sumar as 12.600 hectáreas que arderan ata ese momento no que vai de ano, o que ofrece un total de 48.100 queimadas en 2017.
Por Galicia Confidencial | Santiago de Composteka | 18/10/2017 | Actualizada ás 20:07
A vaga de incendios da pasado fin de semana en Galicia arrasou unhas 35.500 hectáreas, segundo as estimacións provisionais da Xunta. Esta cifra supón máis que o queimado entre os anos 2014 (1.991 hectáreas calcinadas), 2015 (12.234 hectáreas) e 2016 (21.118 hectáreas) xuntos.
Ás 35.500 hectáreas da fin de semana hai que sumar as 12.600 que arderan ata ese momento no que vai de ano, o que ofrece un total de 48.100 queimadas en 2017.
Estas 48.100 hectáreas supoñen o segundo ano con máis superficie calcinada en Galicia desde a vaga de incendios de 2006 (entón foron 95.947 hectáreas).
De feito, xa é o cuarto exercicio con máis hectáreas queimadas nos últimos 25 anos, só superado en 2006, 2005 (57.452 hectáreas) e 1998 (48.173).
Nun comunicado, a Consellería do Medio Rural apunta que "traballa intensamente na cuantificación de danos, tanto persoais como ambientais", á vez que espera que "caia todo o peso da lei" sobre "os responsables deste terrorismo incendiario".
