Oito de cada dez cidadáns consideran o galego a súa lingua materna
Con todo, nove de cada dez galegos tamén ve o castelán como a súa lingua materna.
Por E.P. | SANTIAGO DE COMPOSTELA | 30/11/2017 | Actualizada ás 14:11
Oito de cada 10 galegos (o 82,8%) consideran o idioma propio de Galicia a súa lingua materna, segundo a enquisa sobre a participación da poboación adulta nas actividades de aprendizaxe que publica este xoves o Instituto Nacional de Estatística (INE).
De acordo con esta enquisa, nove de cada 10 galegos (o 91,4%) ven o castelán como a súa lingua materna. Por lingua materna, o Instituto Cervantes entende a primeira lingua que aprende un ser humano na súa infancia e que normalmente devén o seu instrumento natural de pensamento e comunicación. Adoita ser a lingua da nai, aínda que tamén pode ser a de calquera outra persona: pai, avós, etcétera.
Con todo, esta institución pública advirte da complexidade do termo ao referirse a algúns criterios considerados na caracterización do concepto. Un deles establece que lingua materna é "a que un sente como propia, como parte da súa identidade individual e da súa propia comunidade", apunta.
A enquisa, con datos de 2016, recolle, como linguas maternas ou non maternas, que o 98,9% da poboación no Estado español podía usar o castelán, o 17,5% o catalán, o 6,2% o galego, o 5,8% o valenciano e o 3,0% o eúscaro.
O GALEGO, A LINGUA COOFICIAL MÁIS COMPRENDIDA
Por comunidades autónomas, o catalán podía ser utilizado case polo 85% da poboación de Cataluña e polo 63,1% da de Illes Balears. O galego polo 89,0% da poboación galega e o valenciano polo 51,8% dos residentes en Comunitat Valenciana. O eúscaro podía ser utilizado polo 55,1% da poboación vasca e polo 21,7% da navarra.
En concreto, sobre as linguas maternas, o catalán era en 2016 a lingua materna do 55,5% dos cataláns e do 42,9% dos residentes en Illes Balears. O galego era a lingua materna do 82,8% dos galegos, o valenciano a do 35,2% dos residentes en Comunitat Valenciana e o eúscaro a lingua materna do 33,7% dos vascos e o 14,6% dos navarros.
A ENQUISA
A enquisa sobre a participación da poboación adulta en actividades de aprendizaxe ofrece información sobre a participación en actividades de educación e aprendizaxe da poboación de 18 a 64 anos.
Tamén proporciona información sobre coñecementos lingüísticos e características educativas. Pola súa propia natureza, é a principal fonte de información sobre o nivel de estudos alcanzados pola poboación española.
