A Xunta convoca ao comité de folga de Xustiza a unha nova reunión o vindeiro mércores

A Xunta convocou ao comité de folga do persoal da Administración de Xustiza a unha nova reunión, que terá lugar o vindeiro mércores, día 31 de xaneiro.

Así o comunicou a Xunta a través dunha nota de prensa na que reiterou a súa vontade de seguir dialogando co obxectivo de chegar canto antes a un acordo, a condición de que "este respecte a legalidade vixente".

O Goberno galego lembrou que xa se chegou a consenso en "varios aspectos da negociación, que redundan en melloras tanto para os propios traballadores como na prestación de servizos á cidadanía. En concreto, chegouse a consenso en tres do cinco asuntos que estaban sobre a mesa, e agora queda a principal diferenza na contía salarial.

A Xunta realizou unha oferta económica que "iguala á media de lso restantes territorios e que mellora as condicións salariais dos traballadores con respecto a comunidades como Cataluña, a Rioxa, Aragón, Baleares, Murcia, Estremadura, Castela e León ou Castela a Mancha. Pola súa banda, as organizacións sindicais reclaman unha subida salarial de 270 euros ao mes, isto é, entre o 12 e o 16%, algo "inasumible para as arcas públicas".

Ademais dos consensos alcanzados e da oferta económica posta sobre a mesa, a Xunta tamén ofreceu melloras adicionais en materia de violencia de xénero, que se aplicarán con independencia do acordo que alcance o comité de folga.

Estas melloras, indicou a Xunta, pasan pola creación de sete prazas de psicólogo para os servizos de atención a vítimas existentes no sete grandes cidades galegas, o reforzo de persoal nos xulgados de violencia sobre a muller naqueles casos nos que sexa necesario pola súa carga de traballo, e o establecemento dun complemento lineal por obxectivos ligados ao traballo en violencia de xénero.