A Xunta destinou 13.000 euros a campionatos de caza de raposo entre 2016 e 2017
Libera e Franz Weber critican que a chamada 'Supercopa Galega de caza do raposo' de 2016 foi declarada "proxecto de especial relevancia".
- A bucinazos para salvar raposos dunha masacre
- A Xunta financia campionatos de caza por ser “educativos” e “cruciais no desenvolvemento das persoas”
Por E.P. | SANTIAGO DE COMPOSTELA | 04/02/2018 | Actualizada ás 13:34
As fundacións animalistas Libera e Franz Weber denunciaron este domingo que a Xunta destinou, durante 2016 e 2017, máis de 13.000 euros a campionatos de caza de raposo como o celebrado o pasado sábado nos municipios pontevedreses de Forcarei, A Estrada, Cerdedo-Cotobade e Campolameiro.
Os animalistas tamén criticaron que a chamada 'Supercopa Galega de caza do raposo' de 2016 foi declarada "proxecto de especial relevancia".
Xunto a esta cantidade, a Federación Galega de Caza embolsouse máis de 55.000 euros da Secretaría Xeral para o Deporte, que se suman a outros 50.000 percibidos desde a Consellería do Medio Ambiente en convenios de colaboración.
As asociacións censuraron tamén que a Federación Galega de Caza chegase a "atacar" a formacións políticas ou que pedise rebaixar a idade efectiva para cazar aos 14 anos, situada actualmente nos 16.
Así, os animalistas criticaron a actitude do Executivo autonómico cunha disciplina que, nas súas palabras, é "rexeitada pola inmensa maioría da cidadanía".
Neste sentido, as fundacións anunciaron a elaboración dunha proposición lexislativa para suprimir a caza como actividade deportiva e coa que perseguen que non se poida beneficiar dos fondos públicos.
