Funcionarios de xustiza seguen con actos de protesta: fan cola para pedir "emigrar" e solicitan anticipos de nómina

Funcionarios de xustiza protagonizaron, na décimo terceira xornada efectiva de folga indefinida, actos reivindicativos de distinto tipo en varias localidades galegas. Na Coruña, por exemplo, realizaron unha petición simbólica de 'traslado' fronte ao "desprezo" cara a este servizo público da Xunta, á que acusan de "danar" á cidadanía co seu posicionamento ante o paro.

Nesta nova xornada de paro, na Coruña, uns 200 empregados de xustiza trasladáronse até a Delegación do Goberno en Galicia onde secundaron unha protesta con maletas de cartón nas que se podía ler "emigramos" e bandeiras doutras autonomías.

Fixérono en resposta á "invitación" que, segundo explicaron, lles fixo durante as negociacións o director xeral de Función Pública, José María Barreiro, de que marchasen "a outro territorio" se non estaban "a gusto", expuxo o portavoz do comité de folga, Sergio Riveiros.

Como "acción de obediencia", ironizou o dirixente sindical, decidiron rexistrar instancias individuais solicitando a convocatoria dun concurso extraordinario de traslados.

CRITICAS A RUEDA E FEIJÓO

"Están implicitamente recoñecendo que cobramos menos do que é normal", engadiu Sergio Riveiros. Ao fío diso, preguntouse se "non son eles os que estorban" --en alusión en particular, o presidente da Xunta, Alberto Núñez Feijóo, e o vicepresidente, Alfonso Rueda-- en lugar dos funcionarios de xustiza.

Por outra banda, o portavoz do comité de folga na Coruña reprochou ao presidente do Executivo galego que non teña "o máis mínimo interese neste servizo público" e criticou as súas manifestacións sobre a postura sindical nas negociacións.

"Só existiu unha pseudonegociación con interlocutores que non son os nosos naturais", expuxo ao cuestionar a presenza do director xeral da Función Pública. Ao fío diso, criticou que o conselleiro de Xustiza, Alfonso Rueda, "negouse en redondo a negociar".

A Rueda, a Feijóo e ao director xeral de Función Pública dirixíronse os lemas coreados polos funcionarios participantes no acto ante a Delegación do Goberno e tamén exhibidos nas maletas de cartón para simbolizar a súa suposta "emigración" a outras autonomías.

OUTROS ACTOS REIVINDICATIVOS

Mentres, noutras localidades rexistráronse todo tipo de actos simbólicos como a representación dun "golpe de estado á xustiza" con motivo da efeméride do 23-F. É o caso de Lugo, con funcionarios disfrazados de Antonio Tejero, mentres compañeiros gritaban "mans arriba, isto é un atraco!", e tamén de Vigo.

Na cidade olívica, do mesmo xeito que en Ourense, tamén houbo colas no rexistro do edificio administrativo da Xunta para reclamar a dimisión de José María Barreiro, como director xeral de Función Pública, e en Vigo enchéronse impresos de solicitude de anticipos da nómina.

Os traballadores, cuxos representantes esixen un cambio de interlocutor por parte da Xunta para volver sentar, tamén chegaron a demandar unha entrevista co presidente galego, Alberto Núñez Feijóo.