As mulleres en Galicia cobran 4.500 euros menos que os homes
As diferenzas agudízanse entre os 26 e os 45 anos, idades coas que moitas mulleres aínda teñen que pagar unha “peaxe” por ser nais e coidar dos seus fillos. Ademais, os seus traballos son máis precarios que o dos homes.
Por Galicia Confidencial | Compostela | 08/03/2018 | Actualizada ás 11:34
Técnicos do Ministerio de Facenda (Gestha) calculan que a fenda salarial da muller en Galicia supera os 4.500 euros. É dicir, cobran case un 30% menos que os homes, de acordo á segunda edición do informe “Brecha salarial e teito de cristal”, que foi presentado onte.
Os resultados deste estudo reflicten que a maior fenda localízase en Pontevedra; e a menor, en Ourense, onde aínda así as mulleres continúan cobrando 3.000 euros menos que os homes.
O informe apunta que se necesitarían case sete décadas para acabar coa diferencia salarial en España. Ademais, revela que a desigualdade en 2016 reduciuse un 0,3% respecto ao ano precedente, rompendo a tendencia de crecemento que se iniciou en 2013. En calquera caso, mantívose un 3,5% por encima da que había en 2007, ano da serie histórica con menor desigualdade ata a data.
As diferenzas que existen entre os salarios duns e outras se deben, maioritariamente, a que hai máis mulleres que homes que non chegan aos 1.000 euros de ingresos ao mes. No entanto, a fenda comeza a acentuarse a partir dos 16.000 euros anuais, ata o punto de que o número de mulleres con soldos entre os 50.000 e os 80.000 euros ao ano é a metade que o de homes, e de que unha de cada cinco traballadores con soldos de 140.000 euros é muller.
FENDAS POR IDADES
A fenda salarial entre homes e mulleres non só responde o lugar de residencia ou aos limiares de soldo, senón que se ensancha conforme aumenta a idade. É máis, as diferenzas agudízanse entre os 26 e os 45 anos, idades coas que moitas mulleres aínda teñen que pagar unha “peaxe” por ser nais e coidar dos seus fillos. Así mesmo, os técnicos atribúen a fenda existente entre os 46 e os 65 anos ao coidado de maiores; e a que se dá máis aló dos 65 anos, ao dos netos.
Por outra banda, a diferencia salarial das mulleres de 46 a 65 anos é un terzo do seu soldo, e os técnicos remarcan que as ocupadas maiores de 65 anos cobran un salario por baixo da metade que os homes da súa mesma franxa de idade. Non é que a igualdade chegase ás novas xeracións, pero Gestha admite que a brecha se estreita entre as traballadoras menores de 25 anos de varias provincias, entre elas, Lugo.
Ademais, na etapa adulta, as maiores fendas entre os 46 e 55 anos están localizadas en Madrid, Barcelona, Tarragona, Guadalaxara, Castelló, Melilla e Burgos. A partir desta idade, de novo, as diferenzas máis significativas atópanse en cidades como Madrid, Barcelona, A Coruña, Valencia e Tarragona.
PRECARIEDADE
Aínda que é certo que o 34% das persoas ocupadas cobran por baixo do Salario Mínimo Interprofesional (SMI), que para 2016 estivo situado en 9.172,80 euros, non é menos certo que, unha vez máis, a muller carrexa coa peor parte, pois case 3,2 millóns de traballadoras non chegan ao SMI, copando máis da metade dos empregos precarios en ambos os sexos.
