Podemos reclama alianzas electorais en forma de coalición

Podemos Galicia consultará ás súas bases as fórmulas coas que presentarse con outras forzas políticas e plataformas municipalistas para as eleccións locais de 2019. Tamén consultarán ás bases se desexan que a marca "Podemos" figure na candidatura, aínda que isto último non se aplicará naqueles concellos onde xa hai "marcas consolidadas" como A Coruña, Santiago e Ferrol, onde gobernan mareas desde 2015.

Así o dixo a secretaria xeral da formación, Carmen Santos, quen incidiu en que o partido aposta por "dar continuidade" aos proxectos municipalistas xurdidos en 2015.  Buscan ademais reforzar a  "política de alianzas", aínda que matizou que a última palabra a teñen os seus inscritos. Santos reivindicou o valor da palabra 'Podemos' porque "abriu unha vía de esperanza" coa súa "irrupción" en 2014 que até entón "non existía". Santos cre que a súa adición ás marcas electorais municipais sería importante en termos de "identificación" para a cidadanía.

No entanto, en liña co aprobado o pasado sábado no Consello Cidadán Estatal, máximo órgano de dirección da organización, a proposta do líder morado, Pablo Iglesias, o requisito de que a súa sigla figure no nome electoral para que Podemos se integre na candidatura non se aplicará naqueles lugares onde exista unha "marca consolidada".

En Galicia, este sería o caso de muncipios como A Coruña, Santiago de Compostela ou Ferrol, onde desde 2015 as alcaldías están ostentadas polos denominados "gobernos do cambio", Marea Atlántica, Compostela Aberta e Ferrol en Común. Está por ver se a esixencia de incluír a palabra Podemos tamén se articula noutros proxectos municipalistas que, a pesar de non gobernar, tamén se presentaron en 2015, como Ourense en Común, Marea de Vigo ou Marea de Pontevedra.

ANTECEDENTES

Nas eleccións municipais de 2015, Podemos non se presentou e unicamente apoiou con maior ou menor grao de implicación as candidaturas que xurdiron de movementos ou plataformas cidadás. Nas sucesivas citas electorais, a marca Podemos foi motivo de discusión política entre as forzas que formaron as mareas.

Aínda que Pablo Iglesias mantén a relevancia de incluír a marca Podemos nas candidaturas, foi el mesmo o que propiciou o acordo a última hora nas eleccións autonómicas de 2016 cando as negociacións con En Marea xa estaban rotas polas discrepancias na fórmula de concorrencia e cando Luís Villares xa se postulou para ser candidato á Xunta.

CONSULTA FALA DE COALICIÓN

A pregunta que Podemos realizará aos seus inscritos na consulta, que se convocará "moi pronto", segundo Santos, é: "Apoias que Podemos se presente ás próximas eleccións municipais en coalición coas forzas políticas e as plataformas municipalistas aliadas do espazo do cambio e coa palabra Podemos formando parte do nome da candidatura, salvo onde xa exista unha 'marca' consolidada?". Con todo, Marea Atlántica xa aprobou unha renovación do seu regulamento interno no que descartan calquera tipo de coalición con partidos e organizacións alleas ao municipalismo.

Cuestionada por este asunto este luns, Carmen Santos indicou que o rexedor herculino, Xulio Ferreiro, "non vai esquecer o apoio da xente de Podemos que deixa a pel por defender o goberno municipal" da Coruña e asegurou que "moita cidadanía" da cidade "non quere" que a organización morada "desapareza".

Nesta liña, a tamén deputada de En Marea reclamou que os inscritos de Podemos queren "poder participar máis", "ter máis representación" nos proxectos municipalistas e non ser simplemente "observadores"; aínda que, a continuación, matizou que non imporán nomes nas listas porque os alcaldes deben estar "cómodos" cos seus equipos. Ademais, Santos deslizou unha crítica a Marea Atlántica e lembrou que Podemos conta cuns 2.000 inscritos na Coruña, o que contrapuxo ás "140 persoas" que participaron na consulta na que a marea herculina aprobou o seu novo regulamento.

DEBATE DAS SIGLAS

Sobre o debate das marcas electorais aberto no seo das mareas municipalistas tamén se pronunciaron este luns o portavoz de En Marea, Luís Villares, e o alcalde de Santiago, Martiño Noriega. Para Villares, Pablo Iglesias "salvou os espazos onde estean consolidadas as marcas" e, ao seu xuízo, "é evidente que a marca En Marea é recoñecible socialmente"; mentres que o rexedor compostelán volveu remarcar que o importante é "a unidade popular", que é o que "suma" e non as siglas.

Carmen Santos afirmou que esas son as "opinións" deles e reclamou que se respecte "a democracia" interna de cada organización. "Estou de acordo en aparcar os debates de siglas, pero eles e nós", resolveu en alusión a Noriega.