Estrea de 'Nove de Novembro', o primeiro filme gai en galego
Presentarase en Galicia o 7 de abril, no Teatro Colón da Coruña, logo da súa andaina por varios festivais.
- Facebook censura a promoción de ‘Nove de Novembro’, o primeiro filme gai en galego
- “Vivimos un espellismo de normalización do colectivo LGTB”
Por Galicia Confidencial | Santo | 14/03/2018 | Actualizada ás 13:05
O filme Nove de Novembro, primeiro de temática LGBT (lesbianas, gais, bisexuais e transexuais) rodado en galego, chegará finalmente as pantallas galegas o vindeiro 7 de abril cunha presentación especial no Teatro Colón da Coruña.
A proxección será as 20:30 e os asistentes terán a posibilidade de falar cos actores e o director da cinta. A entrada para ver o filme será gratuita, previa retirada en taquilla, e os horarios poden consultarse na páxina web do teatro.
O evento, organizado pola asociación ALAS, Costura Films e o Comité Anti-SIDA da Coruña contará coa presenza dos membros do equipo técnico e artístico que fixeron posible a cinta.
Este proxecto, que comezou a sua andaina en festivais no mes de febreiro, xa puido verse nos festivais Zinegoak, en Bilbao e San sebastián, no New Renaissance de Amsterdam e no qFLIX de Philadelphia. Retornando así a cidade onde foi rodado o pasado mes de agosto antes de voltar de novo ao seu percorrido por festivais.
O filme, dirixido por Lázaro Louzao e protagonizado por Ademar Silvoso e Brais Yanek, tivo un orzamento de só 30.000 euros e foi financiado parcialmente a través dunha campaña de crowdfunding.
Non exento de polémica, o pasado mes de novembro Galicia Confidencial informaba de que Facebook censurara a promoción deste filme na rede social por mor dun bico entre os dous protagonistas no trailer.
