Creánse brigadas deseucaliptizadoras en Galicia para erradicar esta especie invasora
Esta nova iniciativa, coordinada por Verdegaia, pretende activar brigadas locais nos concellos para axudar na reforestación dos montes con especies autóctonas.
Por Galicia Confidencial | Vigo | 10/04/2018 | Actualizada ás 10:21
O próximo sábado 21 de abril ten lugar o lanzamento público dun novo proxecto, as Brigadas deseucaliptizadoras, unha iniciativa da asociación ecoloxista Verdegaia que ten coma obxectivo reforestar os montes galegos con especies autóctonas no canto de especies foráneas e invasoras.
A súa primeira acción será na Área Conservada pola Comunidade Veciñal de Froxán, en Lousame. Esta intervención, a primeira das programadas en Froxán, levarase a cabo en varios hábitats de interese comunitario e interese prioritario, e realizarase de maneira sinérxica coas iniciativas de restauración de hábitats degradados promovidas pola Comunidade do Monte Veciñal en Man Común de Froxán e a Sociedade Histórica e Cultural «Coluna Sanfins».
“Esta xornada é só o inicio do proxecto de Brigadas deseucaliptizadoras. Conscientes de que son moitas as persoas que en todo o país están desexando realizar accións de voluntariado ambiental en relación aos coidados do monte e a evitación de lumes, pensamos que é preciso organizar e coordinar todo ese potencial”, indican desde Verdegaia. Con esa finalidade, e coa vista posta nas accións de restauración ambiental e na “deseucaliptización do monte galego”, esta entidade considera “urxente e prioritaria” a creación destas Brigadas.
O proxecto está tamén pensado para que calquera colectivo (comunidades de montes veciñais, asociacións veciñais, grupos de sendeirismo...) poida implicarse na organización dunha brigada local. Así, aqueles colectivos locais ou titulares de parcelas forestais que queiran establecer unha Brigada no seu territorio, poden anotarse tamén por medio da web, no formulario de incorporación de parcelas. “Priorizaranse, en todo caso, aqueles terreos que estean en zonas máis susceptibles de sufrir incendios, e as que alberguen hábitats naturais ou especies ameazadas”, engaden.
Aquelas persoas que queiran participar nesta xornada deben anotarse na páxina web das Brigadas deseucaliptizadoras (verdegaia.org/brigadas/). A data límite para anotarse nesta primeira Brigada é o 16 de abril.
