Pepe Blanco irá á comisión sobre o Alvia en canto haxa "día e hora"

O eurodeputado socialista e exministro de Fomento José Blanco asegurou que "xamais" trasladou "decisións políticas" aos técnicos responsables da execución e a supervisión da seguridade na liña de Angrois, Santiago. Aquel foi o lugar onde se produciu o accidente do tren Alvia en xullo de 2013 que deixou 80 mortos e 144 feridos.

A preguntas dos xornalistas durante un acto en Santiago, xusto dous días despois de que se constituíu a comisión de investigación parlamentaria sobre este sinistro, Blanco reiterou a súa disposición a comparecer. "Só ten que pór día e hora a comisión para que eu poida comparecer", aseverou.

Baixo o seu mandato como ministro de Fomento cambiouse o proxecto da liña. Isto trouxo retirar o 'ERTMS' (Sistema Europeo de Xestión do Tráfico Ferroviario) dos últimos quilómetros, no lugar onde está a curva coa que impactou o convoi. Neses momentos o tren circulaba cun exceso de velocidade ao ser distraído o condutor por unha chamada do interventor. Con todo, permaneceu instalado o sistema embarcado no tren, que se desconectou despois, xa con Ana Pastor á fronte do ministerio.

Agora, "o que vai atender a comisión de investigación en sede parlamentaria é observar se houbo decisións políticas que condicionaron a posta en servizo e por tanto a execución desa obra", segundo explicou o propio José Blanco.

"SERÁ QUE HOUBO DECISIÓNS TÉCNICAS NON XUSTIFICADAS"

O eurodeputado dixo estar "disposto a explicar todas e cada unha das decisións" que adoptou como ministro. Preguntado sobre se os altos cargos hoxe investigados na causa xudicial polo accidente atendían decisións políticas, subliñou que el "xamais" deu "a un técnico unha decisión política".

Blanco afirmoi ademais que "se hai que pór unha baliza, se hai que pór un sinal de 120 nunha autovía, eu non creo que ningún ministro lle teña que dicir ao responsable de seguridade do ministerio que ten que pór un sinal de 120 en lugar dun sinal de 80, por pór un exemplo para que se entenda do que estamos a falar".

Neste momento son dous altos cargos, un de Adif e un de Renfe, os imputados xunto ao maquinista e a tres técnicos de Ineco. Esta última é a consultora encargada da avaliación independente dos riscos que puidese entrañar a liña. "Se están imputados cargos que xestionaban diferentes ámbitos da posta en servizo da liña ou da posta en servizo do tren será porque houbo decisións técnicas que non estaban xustificadas", constatou o extitular de Fomento.

Neste sentido, sinalou que "até agora" non houbo "ninguén" imputado "por unha decisión política". Por tanto, chamou a "diferenciar o que son as decisións que se tomaron ou non se tomaron en función da responsabilidade que un tiña". Ademais, engadiu que "estar investigado non significa máis que comparecer ante o xuíz e dar explicacións duns feitos que se produciron, pero en todo caso hai que ser moi respectuosos coa investigación xudicial e hai que seguir crendo na presunción de inocencia de todo o mundo".

A CAUSA XUDICIAL E A COMISIÓN "SE SOLAPAN"

Aínda que o seu criterio, "por coherencia política" e "non porque non quixese comparecer ante unha comisión de investigación", é que "mentres houbese un proceso xudicial aberto non tiña que solaparse cunha comisión de investigación parlamentaria", agora manifesta estar "encantado" de ter "a oportunidade de ir refutando algunhas cousas que se dixeron".

Non o fixo até agora, segundo agregou, "por respecto ás vítimas, á asociación, e porque non quería xerar ningún tipo de polémica". "Pero se puxeron de manifesto e se deron feitos por certos que non o foron, por tanto tamén terei a oportunidade de poder responder porque á fin e ao cabo do que se trata é de que se coñeza toda a verdade", apostilou.

Neste sentido, profundou en que se se opuña á comisión de investigación era por "un argumento de coherencia política", aínda que "algúns interpretaban que era a escusa para non acudir" a ela. "Unha vez que os grupos políticos tomaron a decisión de constituír a comisión, eu tamén ratifico o que sempre expuxen: a miña disposición a poder comparecer para clarificar aquelas cuestións que eu poida contestar a partir das interpelacións que formulen os diferentes grupos", finalizou.