Eurodeputados galegos avisan que os recortes da UE en política agraria serán moi negativos para Galicia

A Comisión Europea presentou este mércores a súa proposta para o próximo orzamento da UE, que abarca desde 2021 até 2027, no que expón recortar os fondos agrícolas da PAC e de cohesión --un 5% e un 7%, respectivamente-- e aumentar o gasto dedicado a políticas como inmigración, seguridade e a defensa, a investigación e a innovación e economía dixital.

O presidente do Executivo comunitario, Jean-Claude Juncker, e o comisario de Orzamentos e Recursos Humanos, Günter Oettinger, desvelaron ante o pleno da Eurocámara o borrador orzamentario, que será o primeiro sen o Reino Unido porque abandonará o bloque comunitario en marzo de 2019. Así, Bruxelas propuxo un orzamento plurianual de 1.135 billóns de euros, o que representa un 1,11% da renda nacional bruta a Vinte e sete e é unha cifra "comparable" ao actual orzamento se se ten en conta a inflación.

Neste sentido, a Comisión Europea espuxo reducir "moderadamente" o financiamento da Política Agrícola Común (PAC) e a Política de Cohesión un 5% e un 7%, respectivamente, segundo indicou o comisario alemán no Parlamento Europeo. España é un dos países máis beneficiados destes fondos, que representaban aproximadamente o 70% do último marco financeiro plurianual da UE.

En concreto, a PAC contará cun orzamento de 365.000 millóns de euros entre 2021 e 2027, mentres que o fondo europeo de desenvolvemento rexional e cohesión terá unha dotación de 273.000 millóns de euros. "Estas políticas modernizaranse para asegurarse de que poden alcanzar os seus obxectivos con menos recursos e mesmo servir novas prioridades", explicou a Comisión Europea nun comunicado.

"FORTE IMPACTO" PARA GALICIA

Ante estos recortes, a eurodeputada do BNG Ana Miranda alerta de que "para Galicia terían un forte impacto e unhas repercusións moi negativas no conxunto dos sectores produtivos". A este respecto, Miranda avisa de que o Bloque non apoiará "en ningún caso" estes recortes, senón que defenderá que se poidan modificar os orzamentos pos 2020 para que a saída de Reino Unido da UE, que resta 14.000 millóns de ingresos, non se compense cun recorte de fondos en agricultura e cohesión.

Pola súa banda, a eurodeputada de Esquerda Unitaria Europea, Lídia Senra denunciou que a UE "emprega o diñeiro da cidadanía para machacar ás vítimas das súas políticas económicas". Neste sentido, Senra lamenta "o desvío" do orzamento público, con recortes en políticas da PAC e de fondos de cohesión, en favor da industria militar.

Mentres, o eurodeputado do PSOE, José Blanco, estes orzamentos "carecen de ambición" e pediu á Comisión Europea que non aplique recortes en agricultura, pesca e cohesión. Para Blanco, a proposta do Marco Financeiro Plurianual para 2021-2017 parte de erros na análise de prioridades. "Hai que atender novas prioridades sen deixar de antender as vellas".

TOPE DE 60.000 EUROS POR EXPLOTACIÓN NA PAC

Así, a Comisión Europea proporá establecer un tope nos pagos directos da futura Política Agrícola Común (PAC) de 60.000 euros por explotación, segundo desvelou este mércores o comisario de Agricultura e Desenvolvemento Rural, Phil Hogan. O Executivo comunitario presentará a súa proposta definitiva para reformar a PAC a finais deste mes ou principios de xuño, pero o comisario irlandés avanzou algúns detalles nunha rolda de prensa con motivo do borrador orzamentario que Bruxelas expuxo para o período 2021-2027.

Este orzamento plurianual será o primeiro sen Reino Unido, que deixará un buraco nas contas comunitarias de 12.000 millóns de euros. Por iso, Hogan sinalou que o recorte do 5% que se expón para os fondos agrícolas é "un resultado xusto" para os agricultores. O responsable de Agricultura do Executivo comunitario garantiu que os pagos directos non caerán máis do 3,9% en ningún Estado membro. Ao mesmo tempo, apuntou que os Estados membros poderán utilizar os aforros deste tope máximo 'capping' de 60.000 euros para redistribuír as axudas a explotacións pequenas e medianas.

"Se tes en conta o 'capping' (...) e o sistema de redistribución de pagos que imos introducir, o impacto dos recortes será menor para pequenas e medianas explotacións", expresou Hogan. En concreto, o irlandés detallou que serán 16 os Estados membros que verán reducidos en aproximadamente un 3,9% os pagos directos, seis nos que caerán por baixo desta cifra e outros seis nos que aumentarán.

Bruxelas propuxo recortar un 10% a cofinanciación da UE en programas de desenvolvemento rural e Hogan animou aos países a cubrir esta brecha para que desta forma non se vexan reducidos. "Se os Estados membros deciden cubrir este buraco no desenvolvemento rural, significaría que non haberá recortes", afirmado, para despois precisar a modo de exemplo que isto suporía uns 180 millóns anuais no caso de España.

Outro dos aspectos que destacou o comisario irlandés do novo orzamento da UE é que se dediquen 10.000 millóns de euros para a investigación e a innovación na agricultura, o desenvolvemento rural e a bioeconomía, un "sinal moi importante" que mostra que a UE "está a modernizar a súa política agraria". "En conclusión, o orzamento sobre agricultura é un resultado xusto porque a pesar da perda de fondos polo Brexit e das novas prioridades, a gran maioría dos agricultores sufrirán unha pequena redución dos pagos directos e, se os Estados membros cooperan, non haberá recortes no programa de desenvolvemento rural", resumiu Hogan.

NOVAS PRIORIDADES

Por contra, Bruxelas recomenda incrementar o financiamento de "novas e urxentes prioridades", entre as que inclúe os fondos dedicados á investigación e a innovación, a mocidade, a economía dixital, a xestión de fronteiras e a seguridade e a defensa. Desta forma, a Comisión Europea propón dedicar 12.000 millóns á transformación dixital, 30.000 millóns ao programa Erasmus+ e 100.000 millóns (un 50% máis) á investigación e desenvolvemento, a través de programas como Horizonte 2020.

Doutra banda, o documento expón triplicar o orzamento destinado á protección de fronteiras exteriores, inmigración e asilo, que se incrementaría desde os 13.000 millóns até 33.000 millóns. Os fondos dedicados a seguridade crecerían coa proposta un 40% para chegar aos 4.800 millóns e crear un fondo de defensa de 13.000 millóns. Tamén avoga por aumentar un 26% o gasto en acción exterior, que se expandiría até os 126.000 millóns de euros. Neste contexto, a Alta Representante de Política Exterior e Seguridade Común da UE, Federica Mogherini, propuxo crear un fondo extrapresupostario de 10.500 millóns para complementar os programas na área de defensa.

DURA NEGOCIACIÓN

O orzamento da UE deberá ser aprobado por unanimidade entre os países da UE, ademais de ter a aprobación do Parlamento Europeo. Espérase por tanto unha dura negociación durante os próximos meses, algo que xa se prevía despois de que queda patente a división entre aqueles Estados membros favorables a aumentar o orzamento comunitario, como Francia, Alemaña ou España, e aqueles que apostaban por facelo máis austero, como Austria e Países Baixos.

Precisamente, o primeiro ministro holandés, Mark Rutte, criticou o documento presentado este mércores por Bruxelas, que cualificou como "inaceptable" para o seu Goberno. "Unha UE máis pequena significa un orzamento máis pequeno", pediu nunha mensaxe en 'Twitter'.

Na mesma liña expresáronse o chanceler austriaco, Sebastian Kurz, para quen a proposta contén "algúns enfoques positivos", pero "aínda está lonxe de ser unha solución aceptable", o primeiro ministro danés, Lars Lokke Rasmussen. "A Comisión presentou un orzamento da UE do tamaño de 38 países, pero somos só 27 para financialo", dixo o danés.
Imprimir