A loita contra o gas radon chega aos edificios de uso residencial

A exposición ao gas radon é, despois do consumo de tabaco, o segundo factor de risco do cancro de pulmón e o primeiro en persoas que nunca fumaron. Por iso o Código Europeo Contra o Cancro, publicado en 2014 pola Axencia Internacional de Investigación en Cancro da Organización Mundial da Saúde (OMS), sinálao como unha das exposicións ambientais a reducir. 

Galicia é unha zona de elevada exhalación de radon dadas as características xeolóxicas do seu solo, que se fai máis manifesta nas provincias de Ourense e Pontevedra. Así o recolle o Mapa de Radon que realizaron os profesores de Medicina Preventiva e Saúde Pública da Universidade de Santiago (USC) Alberto Ruano Raviña e Juan Miguel Barros Dios.

Ata hai uns anos a loita contra o radon era unha cuestión menor e só centrada en determinados edificios públicos, pero nos últimos tempos, diversos estudos e a insistencia de varios sindicatos fixeron que as administracións públicas asumiran un maior compromiso de loita contra este gas que emanan, sobre todo, os edificios de pedra.

Por iso, o Consello da Xunta autorizou o pasado xoves a sinatura do convenio entre a Consellería de Infraestruturas e Vivenda e o Instituto Tecnolóxico de Galicia para a revisión e actualización da Base de datos da construción de Galicia e  impulsar medidas de protección fronte ao radon en edificios de uso residencial xa existentes.

Deste xeito, a Xunta realizará estudos, informes técnicos e guías en colaboración cos seus técnicos, e está previsto que o primeiro destes traballos sexa a confección dunha guía de solucións construtivas para a protección fronte ao radon en edificios xa existentes de uso residencial. Posteriormente deberán incorporar á base de datos as unidades de obra e materias que se definan na dita guía.

OBXECTIVOS DA BASE DE DATOS

Esta base de datos, segundo a Xunta, está destinada aos axentes vinculados ao sector da construción para a elaboración de presupostos de obra e como elemento de consulta e serve tamén como referencia á Consellería de Infraestruturas e Vivenda, tanto na redacción de proxectos propios como no cálculo de orzamentos relacionados coas diferentes liñas de axudas á vivenda.

Contén os prezos básicos de maquinaria, man de obra, produtos e materiais empregados na construción e unha parte importante das unidades de obra empregadas en edificación, urbanización (obra civil, restauración, mantemento e seguridade) e saúde laboral. Ao tempo, inclúe pregos de condicións, gráficos e textos que poden ser empregados ao desenvolver un proxecto. 

A partir de agora revisaranse e actualizaranse os prezos contidos nela, de acordo coa normativa técnica en vigor e a que se poida aprobar no período de vixencia do convenio. Tamén se actualizarán anualmente os prezos da man de obra e, gradualmente ao longo do período de vixencia do convenio e os prezos de produtos, e daráselles prioridade aos que teñen máis peso no conxunto dun orzamento de construción.

Esta Base de Datos da Construción de Galicia é de titularidade conxunta da Consellería de Infraestruturas e Vivenda e o Instituto Tecnolóxico de Galicia, e colaboran tamén na súa elaboración a Escola de Arquitectura da Universidade da Coruña. A base de datos está dispoñible no portal web www.presupuesta.com, no cal se poden consultar, ademais, outras bases de prezos. 

O RADÓN NOS EDIFICIOS RESIDENCIAIS

Na actualidade, os niveis de radon residencial no ámbito municipal pódense consultar na páxina web do Laboratorio de Radon de Galicia, o de referencia para o noroeste de España, xa que os seus membros participaron no informe sobre o radón da Organización Mundial da Saúde.

O Laboratorio de Radón de Galicia da USC fora comisionado polo Consello de Seguridade Nuclear para a medición en 11 provincias españolas no marco do mapa español. O galego conta na actualidade con máis de 3.400 medicións noutros tantos domicilios da xeografía galega.