Científicos galegos participan nun proxecto europeo para recuperar o berberecho no Espazo Atlántico

Un grupo de investigación da Universidade de Santiago de Compostela (USC) participa no proxecto europeo 'Cockles', unha iniciativa coordinada polo Centro de Investigacións Mariñas de Aveiro (Portugal) para recuperar e aumentar a produción de berberechos nas rexións do Espazo Atlántico —costas de España, Portugal, Francia, Reino Unido e Irlanda—.

En concreto, trátase do equipo Xenética para a Acuicultura e a recuperación de recursos biolóxicos (Acuigen), con sede na Facultade de Veterinaria do Campus Terra, que está coordinado polo catedrático de Xenética Paulino Martínez.

O proxecto 'Cockles', que se estenderá durante tres anos, conta cun financiamento total de 3,6 millóns de euros de fondos europeos, xa que se trata dun consorcio integrado por 22 socios comunitarios.

Así, esta iniciativa parte da base de que o berberecho "é un recurso que reporta beneficios ambientais, socioeconómicos e culturais significativos" ás costas do Espazo Atlántico.

E é que estes bivalvos sofren "unha dobre ameaza provocada polas enfermidades" e, en ocasións, "por unha xestión non sempre eficiente".

Por iso, 'Cockles' propón desenvolver até 2020 medidas orientadas a reverter esta situación e potenciar a súa produción, para tamén crear unha industria "robusta, viable e sustentable da que se derivarían beneficios para a sociedade e tamén a biodiversidade".

Ademais disto, o programa pasa por adoptar novas técnicas e difundir a información necesaria para mellorar a xestión, a conservación e a restauración deste bivalvo.