Levantado o secuestro sobre o libro 'Fariña'
A Audiencia Provincial de Madrid ditou un auto no que revoga a resolución do Xulgado de Instrución Número 7 de Collado Villalba de secuestrar o libro 'Fariña' como medida cautelar, ante a demanda presentada polo exalcalde do Grove Alfredo Bea Gondar.
Por E.P. | MADRID | 22/06/2018 | Actualizada ás 11:09
Na resolución a sala estima o recurso de apelación presentado polo autor do libro, Nacho Carretero, e a editorial Libros del K.O., polo que deixa "sen efecto" as medidas cautelares adoptadas, con "expresa imposición" á parte solicitante das costas procesuais causadas na primeira instancia, "sen realizar especialmente declaración respecto das devengadas nesta alzada".
O auto foi ditado pola Sección Número 20 da Audiencia Provincial de Madrid, a raíz do recurso contra a medida cautelar ditada polo Xulgado de Collado Villalba, en febreiro de 2018, ante a demanda do exalcalde do Grove que reclamaba que se retirase o seu nome do libro e 500.000 euros por unha suposta vulneración do dereito á honra.
E é que o fiscal solicitou este xoves que se desestimase a demanda interposta, ao considerar que non se produciu ningún "ataque" ao dereito á honra por parte do xornalista e pediu que se deixe sen efecto a medida relativa ao secuestro da obra.
