Santiago acolle o primeiro Global Forum Galicia - China
Celébrase este mércores 27 de xuño, a partir das 16.30 horas, no Centro IESIDE. Impartiranse relatorios e mesas redondas a cargo de responsables de compañías que iniciaron a súa expansión chinesa e representantes do Goberno galego.
Por Galicia Confidencial | Santiago de Compostela | 26/06/2018 | Actualizada ás 15:12
O Instituto de Educación Superior Intercontinental da Empresa (IESIDE), de Afundación (Obra Social de Abanca), organiza o I Global Forum Galicia – China, que se celebra este mércores 27 de xuño, a partir das 16.30 horas, no Centro IESIDE (rúa Nova, 33) de Santiago de Compostela, con motivo do peche do curso académico do seu Máster in International Business.
Galicia é a comunidade autónoma que máis investimento chinés recibiu nos últimos cinco anos, por iso IESIDE puxo en marcha esta xornada co obxectivo de ofrecer unha perspectiva actual da política internacional de Galicia, profundar no impacto das novas políticas socio-económicas de China e compartir con directivos do sector agroalimentario, un dos de maior potencial no mercado chinés, as súas diferentes estratexias e a súa visión sobre os obstáculos e oportunidades que se presentan.
Está dirixido a profesionais e directivos de toda Galicia cuxas compañías estean interesadas en abordar un plan de expansión no xigante asiático ou que xa se atopen operando no devandito mercado.
PROGRAMA
Inaugurará a xornada Francisco Pan, xerente de Comercio Exterior de Abanca. A continuación, Augusto Álvarez-Borrás, director da Área Internacional do IGAPE, abrirá a quenda de intervencións co relatorio «Estratexia internacional da Xunta de Galicia».
Ás 17.30 horas, Víctor Cortizo, vicepresidente de Cátedra China e fundador de Cortizo Abogados (Madrid-Beijing) falará sobre «A China da franxa e a ruta».
Finalmente, pechará este fórum a mesa redonda «Experiencias e reflexións do sector agroalimentario galego», moderada por Begoña Jamardo, responsable de Expansión en Asia de IESIDE, e na que participarán Pablo Gómez, director de división láctea de CLUN; Javier Mallo, director xeral de PESCIRO; e Juan Francisco Montans, membro do consello de dirección de Hillos de Carlos Albo.
A asistencia é gratuíta, previa inscrición neste formulario.
A RELACIÓN ENTRE IESIDE E CHINA
IESIDE decidiu en 2012 iniciar os seus vínculos académicos con China co obxectivo de facilitar o intercambio de estudantes e profesorado, realizar proxectos conxuntos e formar en Galicia profesionais chineses con dominio do español que poidan apoiar a expansión do tecido empresarial autonómico proporcionando aos estudantes coñecementos de negocios, culturais e lingüísticos.
Con este fin, ademais dos acordos de colaboración e intercambio con universidades chinesas, desde o ano 2016 impártese o Diploma Avanzado de Relacións Internacionais (DARI) que este verán cursarán 18 estudantes da University of International Business & Economics (UIBE), institución líder en comercio exterior localizada en Pequín, con máis de 16.000 estudantes, dos que 3200 son estranxeiros. No DARI participarán tamén 5 estudantes españois do Grao en Administración e Dirección de Empresas – BBA de IESIDE que, xunto cos estudantes de UIBE, desenvolverán proxectos para empresas de interese estratéxico en Galicia como a pesca, o viño ou o téxtil.
