Beiras, sobre os partidos escindidos de Ferrol en Común: "Se son analfabetos, o que teñen que facer é ir á escola"

O histórico dirixente nacionalista e membro do Consello das Mareas Xosé Manuel Beiras mostrou este venres o seu apoio público a Ferrol en Común e ao rexedor Jorge Suárez, logo do xurdimiento de dous novos proxectos políticos froito de escisións no seo da marea que ostenta a alcaldía de Ferrol desde 2015.

O histórico dirixente nacionalista, Xosé Manuel Beiras.

Beiras arroupou este venres a Jorge Suárez nun acto celebrado no Ateneo Ferrolán no que defendeu o traballo levado a cabo por Ferrol en Común e o alcalde no últimos tres anos. Ademais, cualificou de "mentira e fraude" a creación de novos proxectos do espazo político da esquerda rupturista que poderían competir na cita coas urnas do próximo ano coas mareas xa existentes en 2015.

Fíxoo días despois da celebración do III Encontro Municipalista celebrado tamén en Ferrol, onde se reuniron un cento de representantes de 25 mareas municipalistas. Os asistentes elaboraron un documento no que cargaban contra a actitude da coordinadora de En Marea —que equivale á executiva nun partido— porque algúns dos seus membros, ligados a Cerna, apoiaron o nacemento de Marea de Ferrol, escisión de Ferrol en Común liderada pola ex-concelleira Esther Leira, agora no grupo de non adscritos após o seu enfrontamento con Suárez.

De feito, a cúpula do partido instrumental, co portavoz, Luís Villares, á cabeza, non foi convidada a participar no Encontro Municipalista do pasado sábado. As mareas alí presentes consideran que a coordinadora do partido instrumental actuou con deslealdade cara a Jorge Suárez e Ferrol en Común pola presenza dalgúns dos seus membros na presentación de Marea de Ferrol.

Cinco días despois, Beiras mostrouse crítico coa fragmentación dos proxectos municipalistas de cara ás eleccións do próximo ano, nas que, para o referente da formación nacionalista Anova, "non pode haber varias alternativas de unidade popular porque é unha contradición interna".

"COOPERACIÓN", "NON COMPETICIÓN"

O dirixente lembrou que o principio da esquerda é "a cooperación e non a competición" e se iso non se entende "non hai esquerda, nin trapo de gaita". "Levo 50 anos repetíndoo", aseverou Beiras, quen remarcou que a esquerda debe enfrontarse á "propia sociedade capitalista, as sociedades de clases, as sociedades explotadoras" imitando o modelo de empresa cooperativa.

E é que, a menos dun ano para a cita coas urnas, Ferrol en Común podería enfrontarse nas eleccións a dúas formacións impulsadas por ex-membros do seu proxecto, xa que, á xa mencionada Marea de Ferrol, súmase Actúa Ferrol, partido presentado o pasado sábado e que lidera Carlos do Río, que abandonou as filas da confluencia ferrolá —da que era presidente— por desavinzas co propio Suárez.

"OCORRENCIAS"

A continuación, Beiras redobrou as súas críticas cara aos promotores destes novos proxectos. "Se son analfabetos, o que teñen que facer é ir á escola", aseverou, para logo remarcar que estes dirixentes "no canto de grandes ideas teñen ocorrencias" que "non van a ningún lado e só serven para montar un 'sketch' cómico". "E nin sequera con humor", apostilou.

"Xa teño unha idade para dicir as cousas como son e non podo dicir as cousas con respecto para todo o mundo", remarcou Beiras, que cre que o respecto "hai que merecelo", o que lle levou a lembrar que nunca tivo "respecto político" polo presidente da Xunta, Alberto Núñez Feijóo. "O que me produce é conmiseración", engadiu en relación ao popular.

REVALIDAR ALCALDÍA

Pola súa banda, Jorge Suárez comentou que o proxecto de Ferrol en Común remóntase a "hai moito tempo" e cre froito dun proceso na cidade que empezou "coas loitas obreiras de marzo de 1972", para posteriormente continuar "co movemento de Nunca Máis ou o 15-M" e que ten continuidade na confluencia que se fixo coa alcaldía en 2015 como "unha candidatura de unidade popular, coa ilusión de cambiar a realidade social desta cidade."

"Levamos tres anos pelexando contra os elementos que nos illan para facer a política que queremos realizar", teorizou, aínda que enxalzou que a continuidade do proxecto "se viu reflectida" no III Encontro Municipalista do pasado sábado.

Jorge Suárez buscará en 2015 o que ningún partido político logrou na cidade ferrolá nos anos da democracia: revalidar mandato. "(Ferrol) É unha cidade complexa, na que cada catro anos cambia de ciclo político e non continúa ningún goberno", apuntou antes de mostrarse confiando en romper a tendencia o próximo ano.