O Porto de Vigo carga as responsabilidades do accidente do Marisquiño no concello
Di que lle corresponde a "autorización e vixilancia" do evento.
Por E.P. | SANTIAGO DE COMPOSTELA | 13/08/2018 | Actualizada ás 17:59
A Autoridade Portuaria de Vigo asegurou que, aínda que a titularidade do espazo no que se produciu o derrube durante os concertos do Marisquiño correspóndelle, a "autorización e vixilancia" dun evento destas características recae no Concello. O Porto de Vigo remitiu este luns un comunicado aos medios no que subliña que así o estipula a Lei 10/2017, do 27 de decembro, de espectáculos públicos e actividades recreativas de Galicia.
Así mesmo, subliña que existe un convenio de colaboración subscrito no ano 1992 entre o Consistorio vigués, o Consorcio da Zona Franca e o Porto que establece que "o Concello se compromete, durante os 50 anos de vixencia do convenio, ao mantemento de toda a actuación en perfecto estado de conservación, ben cos seus medios ou ben coa oportuna contratación de obras e servizos".
Na nota de prensa remitida aos medios, ademais, destaca que nos proxectos das diferentes estruturas relacionadas co sinistro que obran en poder da Autoridade Portuaria "non se albisca unha baixa capacidade portante da mesma".
O ente que preside Enrique López Veiga tamén sinalou que, unha vez que a Policía Xudicial levante o acceso á zona, contratará un servizo de peritaje independente para coñecer de primeira man o estado no que se atopa a estrutura e as posibles causas do accidente.
AGRADECE O TRABALLO DOS SERVIZOS DE EMERXENCIAS
Por outra banda, a Autoridade Portuaria de Vigo agradeceu o traballo realizado por parte da Policía Portuaria, así como do persoal que se atopaba de servizo no momento do incidente, como os que, de forma voluntaria, acudiron á zona para prestar apoio aos servizos de emerxencias.
Ademais, trasladou o seu apoio a todas as persoas que se atopaban na noite do domingo no paseo marítimo de As Avenidas, que cedeu durante un dos concertos do festival.
