Festivais de Galicia asegura que non é obrigatorio rexistrar o plan de autoprotección na Xunta
"Entendemos que O Marisquiño pode reclamar fronte á administración titular do porto os danos causados", din desde a Asociación Empresarial Festivais de Galicia.
Por Galicia Confidencial | Vigo | 15/08/2018 | Actualizada ás 18:21
A Asociación Empresarial Festivais de Galicia destacou que para que un plan de autoprotección dun evento como o festival O Marisquiño sexa valido non é requisito obrigatorio o seu rexistro na Dirección Xeral de Emerxencias da Xunta. Así o sinalou a asociación despois de que a Xunta asegurase o martes non ter constancia da inscrición deste plan do Marisquiño no departamento de Emerxencias autonómico a pesar de "ser un dos requisitos legais" para obter a licenza do Concello.
"Esta é, en todo caso, unha obriga administrativa cuxo incumprimento nin sequera está descrito como infracción na lexislación de emerxencias de Galicia", sinalan os festivais galegos, que afirman que "nin tan sequera é obrigatorio" contar cun plan destas características para unha capacidade de 4.500 persoas, como a prevista no Marisquiño.
Fronte a iso, a Asociación Empresarial Festivais de Galicia sinala que "só é obrigatorio a partir de 20.000 persoas". "Se non é obrigatorio telo, moito menos é obrigatorio rexistralo", inciden os festivais, que poñen en valor que O Marisquiño tivese a precaución de elaborar este plan "para 4.500 persoas". "Posiblemente por esa precaución se salvaron vidas", apuntou.
Ademais, esta asociación que reúne a oito dos festivais máis importantes de Galicia tamén subliña que "non existe ningunha lexislación que obrigue ao organizador" do evento a "realizar ningunha comprobación previa" sobre a infraestrutura cedida.
"A lei esixe ao titular que responda fronte ao concesionario polos vicios ocultos. Entendemos que O Marisquiño pode reclamar fronte á administración titular do porto os danos causados por ser autorizada para o uso dunha infraestrutura deteriorada", engadiu.
Por último, felicita os produtores do Marisquiño pola "impecable execución" do plan de autoprotección e solidarízase coas vítimas. Ademais, a asociación critica que "as administracións actuantes, primeiras obrigadas ao cumprimento da lei, estean a buscar a forma de retorcer a lexislación para eludir responsabilidades".
