A oposición abandona a comisión de investigación sobre a sanidade e acusa o PP de actitude "absolutista"

A oposición abandonou "definitivamente" a comisión que investiga no Parlamento galego a situación da sanidade pública en rexeitamento á negativa do PP a "negociar" a ampliación do plan de comparecencias deste órgano, un documento de traballo que o grupo maioritario si ampliou en solitario cun total 13 nomes elixidos entre as propostas formuladas por En Marea, PSdeG e BNG.

As tres forzas da oposición xa se ausentaron deste órgano parlamentario durante as dúas primeiras comparecencias que se rexistraban, as efectuadas este xoves polo xerente do Servizo Galego de Saúde (Sergas), Antonio Fernández-Campa, e polo responsable do Hospital do Salnés, Antonio Martínez Calvo. Ambos os responsables formularon as súas intervencións co Grupo Parlamentario Popular como único interlocutor.

Os deputados da oposición entraron na sesión cando se iniciaba o segundo punto da orde do día, que contemplaba o debate das propostas de modificación do plan de traballo. Unha vez dentro, o tres portavoces en materia sanitaria –Eva Solla (En Marea), Julio Torrado (PSdeG) e Montse Prado (BNG)– protestaron pola negativa do PP a convocar unha reunión extraordinaria desta comisión para volver debater o plan de traballo.

Ademais, volveron a pedir aos populares que introduzan a súa proposta de "mínimos", que a oposición cifra en 44 nomes, tendo en conta que consideran que o actual plan de traballo non permite debuxar a realidade do sistema sanitario galego e supón unha "farsa" ao servizo da xestión do PP.

Con todo, o deputado do PP Aurelio Núñez argumentou que estas forzas buscan "alargar indefinidamente" este órgano co obxectivo de danar ao Goberno do PP e lembrou que o PP se abriu nunha sesión anterior a introducir a 25 comparecentes propostos polas demais forzas, unha oferta que "rexeitou" a oposición.

PETICIÓNS DA OPOSICIÓN

A primeira parlamentaria en intervir da oposición foi a nacionalista Montse Prado, que após denunciar a negativa do PP a convocar unha sesión extraordinaria, cualificou a actitude do grupo maioritario como de "absolutista" e lamentou que fose "imposible sentar a falar" cos populares sobre o plan de traballo.

Pola súa banda, o socialista Julio Torrado acusou ao grupo conservador de converter a comisión nunha "pamplina" ao vetar a "cuarta proposta de comparecencias" da oposición. Torrado, ademais, emprazou ao Goberno galego a explicar "quen non pode falar no Parlamento e por que". "Cospen sobre a vontade democrática!", exclamou.

Nesta liña, a rupturista Eva Solla censurou que o PP "diga que vítimas son as que poden comparecer" na Cámara tendo en conta que si acepta a presenza destas na comisión do Marisquiño pero rexeita que interveñan pacientes na de sanidade, do mesmo xeito que, na súa opinión, ocorre co xerente da EOXI de Vigo, Félix Rubial, investigado na causa que estuda o subministro de medicamentos da hepatite C. Este alto cargo compareceu este xoves na comisión que investiga o accidente ocorrido durante o festival en Vigo.

En fronte, o popular Aurelio Núñez Centeno considerou que por parte da oposición "nunca houbo vontade real" de chegar a un acordo sobre a listaxe de comparecentes. "O Grupo Popular presentamos esta nova proposta de ampliación na que incorporamos ás asociacións máis críticas co Goberno da Xunta, sindicatos, persoas relacionadas con casos da hepatite C e da Estrada; representantes dos colexios profesionais e da sanidade privada", indicou.

Por iso, destacou que "todas esas voces que a oposición di" que o PP "non quere ouvir", "serán ouvidas". "E todos eses temas que din que non queremos tocar, serán tocados", apuntou o portavoz popular.

Finalizadas as intervencións dos grupos, procedeuse a votar as propostas de modificación do plan de traballo. Así, despois de que a presentada pola oposición fose rexeitada pola bancada popular, os deputados de En Marea, PSdeG e BNG abandonaron a sesión e avanzaron á prensa a súa intención de deixar este órgano parlamentario "definitivamente".

Pola súa banda, os populares deron o visto e prace á ampliación do plan de traballo que eles propuñan e que supón incorporar 13 novos comparecentes, todos eles, conforme sinala o PP, "recollidos nas propostas realizadas polos grupos da oposición".

Respecto diso, Núñez Centeno explicou que, con estes novos nomes, a comisión contempla un total de 39 comparecencias, das que 18 figuraban "nos plans de traballo propostos polos grupos". "O Grupo Popular pretende que esta comisión analice a situación real do Sergas", apuntou.

COMPARECENCIAS

Antes de que se producise este tenso debate entre os grupos e sen a presenza da oposición, o xerente do Sergas, Antonio Fernández-Campa, defendeu a xestión da Xunta e destacou a "mellora" experimentada polo sistema nos últimos anos.

"Xunto co sistema educativo, é un dos alicerces do noso sistema de benestar e debemos estar orgullosos del", destacou o xerente do Sergas nunha intervención na que só tivo como interlocutor ao portavoz de Sanidade do PPdeG, o deputado Aurelio Núñez Centeo.

Fernández-Campa subliñou a "gran calidade" da sanidade pública galega e asegurou que a Xunta "seguirá traballando" para incrementar e mellorar a asistencia. Así, defendeu que os indicadores de saúde máis significativos manteñen unha clara tendencia á melloría nestes anos e revelan que se trata dun sistema "eficaz".

Entre outras cuestións, o xerente do Sergas referiuse á evolución do gasto neste sistema e puxo en valor que o orzamento para a sanidade pasou de 3.639 millóns de euros en 2008 a 3.861 millóns en 2018, 222 millóns máis.

XERENTE DO HOSPITAL DO SANLÉS

Tras a intervención de Fernández-Campa, o xerente do Hospital do Salnés defendeu a evolución positiva experimentada por este centro sanitario no últimos dez anos nos que, como sinalou, incrementou un 33% o seu cadro, con 88 novos profesionais.

Así mesmo, tamén cualificou de positiva a modificación da Lei de Saúde no referido ás áreas sanitarias xa que, segundo indicou, a atención ao paciente "vese reforzada" tendo en conta que, na actualidade, especialistas desprázanse a este centro de referencia comarcal. "Con iso resulta beneficiado o paciente", sinalou.

Ademais, tamén lamentou que entidades e formacións políticas "lancen cualificativos negativos" sobre a sanidade pública galega". "Quero pensar que cando fan ese tipo de afirmacións, fano para que se reforcen aínda máis o servizos", sinalou.

Esta comisión de investigación sobre a sanidade foi posta en marcha a petición dos grupos da oposición grazas a última modificación do regulamento da Cámara, que permite que este órgano sexa habilitado de forma automática se así o piden dúas quintas partes da Cámara.