O dono da vivenda do fiscal xefe de Ourense reclama o aluguer á Xunta e a devolución da propiedade

O propietario da vivenda posta pola Xunta de Galicia a disposición do fiscal xefe de Ourense, Florentino Delgado, reclámalle ao Goberno galego, segundo adiantou o diario El País este luns, a devolución da propiedade e o pago do aluguer desde o ano 2016.

Precisamente, a Xunta de Galicia sinalou a través dun comunicado que cesou o abono do aluguer en 2016 tras romper o contrato co arrendador, que fora subscrito en 2004, "previa notificación do devandito cesamento a todas as partes", polo que, desde ese momento, o Goberno galego "xa non é titular do contrato, nin é titular de ningún contrato de aluguer de cargos xudiciais".

Así, tal e como recolle a información de El País, o caso está xudicializado tras presentar o dono do piso unha demanda por falta de pagamento contra a administración autonómica.

A Xunta solicitou que a vista, prevista para o 22 de febreiro, non se celebre. Pola súa banda, a Fiscalía Superior decidiu non pronunciarse respecto diso.

O fiscal chegou ao seu cargo en 2004. Segundo recolle esta publicación, xa co bipartito se notificou a intención de rescindir o contrato, aínda que posteriormente a Xunta acabou póndose ao día. En 2010, o Goberno galego anunciou de novo ao fiscal a rescisión do contrato e que deixaba de pagar as mensualidades dun piso de 200 metros cadrados, aínda que tras unha reclamación de 2011 se recoñeceu o seu dereito ao cobro da renda.