O bispo de Ourense ordenará este domingo ao primeiro diácono permanente na historia da diocese

Este domingo, 31 de marzo, o bispo de Ourense, Leonardo Lemos Montanet, ordenará ao primeiro diácono permanente ao servizo da Diocese, José María Gómez Melón, natural de Santa Ana de Chaodarcas.

Segundo informou o Bispado de Ourense nun comunicado de prensa, este acto terá lugar este domingo na Catedral da capital ourensá ás 18,30 horas.

O Bispado ourensán explica que as funcións dos diáconos na Igrexa consisten en "proclamar o Evanxeo e asistir ao altar, administrar o sacramento do bautismo, presidir a celebración do sacramento do matrimonio, celebrar exequias, levar a comuñón aos enfermos, bendicir, celebrar a liturxia da palabra en ausencia do sacerdote, impartir catequese, asistir aos necesitados, dirixir a administración dalgunha parroquia en colaboración cun sacerdote" e outras.

Para iso fórmanse durante aproximadamente cinco anos, cun curso propedéutico, tres cursos de estudo do grao de bacharelato en Ciencias Relixiosas e un período de pastoral. Antes da ordenación recíbense os ministerios de Acólito e Lector.

"No que se refire ao estado de vida, quen foron chamados na súa mocidade ao diaconado permanente han de gardar o celibato", subliña o Bispado. "Cando se trata de homes casados, son promovidos ao diaconado quen, tras uns anos de vida marital, teñen unha familia cunha vida verdadeiramente cristiá e contan co consentimento da esposa", engade e matiza que, ao quedar viúvos, "os diáconos non están habilitados para contraer matrimonio".

No caso de José María Gómez, "aínda que dá este paso en idade adulta, a súa vocación ao servizo xurdiu moi novo: con 16 anos púxose en contacto cos frades servos de María e estivo en Italia moitos anos formándose e madurando na súa vocación", destaca o Bispado. Por motivos familiares tivo que deixar a orde e tomou este camiño ao Diaconado Permanente.

Misa na catedral de Mondoñedo