Xuízo contra a alcaldesa de Mugardos, de Esquerda Unida, por vulneración do dereito á folga o Día da Muller
Foi denunciada por dúas traballadoras que a acusan de obrigalas a acudir ao posto de traballo o 8 de marzo.
Por Europa Press / Redacción | SANTIAGO DE COMPOSTELA | 14/05/2019 | Actualizada ás 18:27
O Xulgado do Social número 2 de Ferrol deixou visto para sentenza o xuízo celebrado este martes contra a alcaldesa de Mugardos (A Coruña), Pilar Díaz (EU), pola suposta vulneración do dereito á folga de dúas traballadoras públicas que foron supostamente obrigadas pola rexedora a traballar o pasado 8 de marzo, Día Internacional da Muller Traballadora, xornada na que estaban convocados paros.
Minutos antes de celebrase a vista, fixada para as 11,30 horas, realizouse unha concentración ás portas da sede xudicial ferrolá convocada polos sindicatos CC.OO. e CIG, xa que ambas as traballadoras pertencen a estas organizacións.
Segundo denunciou a presidenta do comité de empresa do Concello de Mugardos, Eusebia Pérez (CC.OO.), que compareceu como testemuña no xuízo, estaban alí "pola vulneración do dereito á folga das dúas compañeiras".
Así, explicou que se marcaron uns servizos mínimos co concelleiro de Persoal o día anterior "e incumpríronse sen dar ningún tipo de explicación".
AVISADAS POR SMS
A representante sindical destacou que ambas as traballadoras foron convocadas "a través dunha mensaxe, un SMS, da notificadora, que lles trasladaba que se tiñan que presentar o día da folga a traballar, cando xa estaban nas súas casas, fóra do seu horario laboral, e tras acordar que a maioría de mulleres farían folga"
A presidenta do comité de empresa tamén incidiu que "no seguinte día hábil, que foi o luns, pediuse unha explicación ao concelleiro de persoal, de tipo verbal, reclamando unha aclaración como comité de empresa"
"Pero como non tivemos ningunha contestación, á semana fíxose unha asemblea e pedimos explicacións por escrito, e continuamos a día de hoxe sen obtela", criticou.
O sindicato estima que a actitude da alcaldesa e do seu goberno, de Esquerda Unida, "é moi chocante, xa que desde que están á fronte do Concello, durante dous anos e medio, pódese asegurar que nunca houbo tantas denuncias co persoal laboral".
Por último, Eusebia Pérez incidiu que desde o ámbito laboral non van "permitir que se vulneren dereitos, sexa con este goberno ou con outro que poida vir, xa que non se consentirá que se limiten liberdades como traballadores."
