O desemprego baixa en 5.556 persoas en xuño en Galicia
No conxunto do Estado a baixada do paro foi de 2,07%.
Por Europa Press / Redacción | SANTIAGO DE COMPOSTELA | 02/07/2019 | Actualizada ás 10:36
O número de parados rexistrados nas oficinas dos servizos públicos de emprego (antigo Inem) baixou en 5.556 persoas en xuño en Galicia en relación co mes anterior, ata quedar nun total de 155.249 desempregados, segundo os datos que publica este martes o Ministerio de Traballo.
De acordo con estas cifras, o desemprego na Comunidade galega diminuíu máis que a media: un 3,46% fronte ao 2,07%. É a sexta maior baixada entre autonomías en termos relativos, que lidera Baleares (-6,5%) nun mes de descenso do paro en todas as comunidades.
En termos absolutos supón a cuarta maior caída entre autonomías. Esta cifra total de desempregados en Galicia é a máis baixa desde agosto de 2008 (entón había 152.437 persoas). En relación con hai un ano, o paro en Galicia afecta a 14.816 persoas menos, o que supón unha caída do 8,71% durante os últimos 12 meses --é a segunda maior entre comunidades--.
BAIXA NAS CATRO PROVINCIAS
Por provincias, a diminución máis acusada produciuse en Pontevedra --2.713 desempregados menos, unha baixada do 4,27%--, ata situarse en 60.835 parados. Na Coruña son 1.893 desempregados menos, ata 61.885, un 2,97% menos. Mentres, en Lugo diminuíu en 499, un 3,25%, ata 14.874. En Ourense baixou en 451 persoas, un 2,49%, ata 17.655.
En termos interanuais, Lugo lidera o recorte do paro en termos relativos (-10,29%), seguida da Coruña (-9,35%), Ourense (-8,88%) e Pontevedra (-7,60%). Os parados caeron en todos os sectores de actividade, sobre todo nos servizos (3.763 menos), seguidos da industria (-563), a construción (-367), a agricultura (-304) e o colectivo sen emprego anterior (-559).
En xuño, o desemprego afectou a 9.214 estranxeiros na Comunidade galega, 389 menos que en maio (-4%) e 288 menos que no mesmo período de 2018 (-3%). Son 3.467 comunitarios e 5.747 extracomunitarios.
BAIXA EN TODA ESPAÑA
O desemprego baixou en España en 63.805 desempregados en xuño (-2,07%), o seu menor descenso neste mes desde 2009, cando se recortou en 55.250 persoas. Tras o descenso de xuño, o cuarto consecutivo, o volume total de parados no Estado situouse en 3.015.686 desempregados, o seu nivel máis baixo desde novembro de 2008.
