Á caza de ratos no Hospital de Santiago

A xerencia do Complexo Hospitalario Universitario de Santiago (CHUS) recorreu a unha empresa especializada para inspeccionar as instalacións do Servizo de Farmacia tras o aviso de persoal da presenza de ratos nesas dependencias do hospital compostelán.

Así o confirmaron fontes da xerencia compostelá, que explicaron que a área Sanitaria de Santiago "conta cun plan de control de pragas" e ten contratada unha empresa especializada de forma estable que "realiza labor preventivo e de vixilancia dúas veces ao mes nos puntos máis sensibles".

En días pasados persoal do Servizo de Farmacia avisou da presenza dun rato nas súas instalacións da planta -4, situadas "nunha zona aberta, con comunicación directa con zona forestal e con moita entrada de mercadorías desde o exterior".

A xerencia asegura que "inmediatamente" se avisou a empresa especializada para que "procedese a realizar labores correctivos".

"Hoxe (xoves) visitan a zona por cuarta vez", subliñan as mesmas fontes da área sanitaria compostelá, e "non atoparon indicios da presenza de ningún roedor", conclúen.