Vox pide que a Xustiza investigue o PP por convidar a coller dos buzóns e tirar ao lixo a propaganda da ultradereita

Vox informou este venres, última xornada da campaña para o 10N, de que solicitou á Sala do Penal do Tribunal Superior de Xustiza de Galicia (TSXG) que "investigue" o mitin do PPdeG en Cee no que o seu secretario xeral, Miguel Tellado, convidou os asistentes a "meter a man na caixa de correos dos veciños" para coller e tirar a propaganda electoral do partido de Santiago Abascal.

"Quero convidarvos a que metades a man, agora cando cheguedes a casa, na caixa de correos dos vosos veciños e collades os sibres da bandeira de España, que os abrades e os tiredes co sobre, e tiredes esas papeletas ao cubo do lixo. Estaredes a facer o mesmo que se os vosos veciños usasen esas papeletas o domingo para ir votar e seguro que desa forma lle aforrades un desgusto ao noso país", chamou Tellado, no mitin celebrado este xoves.

O dirixente popular, posteriormente, precisou que o que pretendía era facer "un chiste"; pero Vox remarcou que pediu que se investigue.

Vox A Coruña sostén que "poderían existir indicios de delito por parte dunha persoa aforada", xa que Tellado, ademais de secretario xeral do PP galego é deputado.

Doutra banda, Vox Galicia asegurou de que están a recibir avisos de afiliados e simpatizantes de que "non están a recibir a publicidade electoral". Neste sentido, a formación lembra que "apropiarse da correspondencia allea está tipificado no artigo 197.1 do Código Penal".

DESCULPAS DE TELLADO

O secretario xeral do PP galego, Miguel Tellado, pediu "desculpas" este venres e insistiu, no medio da polémica xerada en redes sociais, en que o seu comentario foi "unha chanza inadecuada".

"É evidente que se trata dunha chanza. Se a alguén molestou, pido desculpas. Pero insisto en unir o voto para evitar que gañe Pedro Sánchez", agregou, posteriormente, na mesma liña, no seu perfil da rede social 'Twitter'.

ABASCAL

Fíxoo no medio dunha polémica xerada en redes, na que interveu o líder de Vox, Santiago Abascal. "O sicario de Feijóo animando a cometer delitos electorais e a violar a correspondencia. Tremendo. Espero unha inmediata condena do PP", sinalou no seu perfil de 'Twitter'.

Tellado respondeulle e insistiu en que xa aclarara que se trataba dunha "chanza inadecuada". "E pedín desculpas se a alguén molestou. O que non acepto é que ninguén me chame sicario", apostilou o dirixente popular.

En redes tamén interveu o PSdeG, quen ironizou con que "agora os amigos de sóbrelos chaman a roubar das caixas de correos as papeletas dos seus socios en Madrid, Andalucía, Murcia...". "Mobilízate, vota. Temos que facer fronte a esta dereita e aos seus apéndices da ultradereita!", proclaman os socialistas.