Renfe pechará a venda presencial de billetes en 8 localidades galegas
Hai estacións afectadas de Lugo, Pontevedra e Ourense.
Por Europa Press / Redacción | SANTIAGO DE COMPOSTELA | 27/12/2019 | Actualizada ás 19:42
O vindeiro martes, día 31 de decembro, Renfe pechará a venda presencial de billetes nas estacións de ferrocarril de Ortigueira, Burela, Sarria, Viveiro, O Carballiño, Ribadavia, Guillarei e Redondela, unha medida á que a Xunta mostrou o seu rexeitamento.
Diso informou a Consellería de Infraestruturas e Mobilidade nun comunicado remitido aos medios, no que explica que o director xeral de Mobilidade, Ignacio Mestre, remitiu este venres unha carta ao representante institucional de Renfe en Galicia, Javier Pérez, na que lle traslada a oposición do Goberno galego a esta medida.
O Executivo galego reclamou o mantemento deste servizo nas estacións de ferrocarril para garantir e preservar en igualdade de condicións a calidade dos servizos a todos os cidadáns. "A Xunta mantén como asunto prioritario a defensa dos servizos ferroviarios que se prestan en Galicia e, neste sentido, considera que eliminar esa atención presencial aos viaxeiros destas localidades supón ir contra os principios de mantemento de servizos de calidade e proximidade aos cidadáns no rural, que deben primar sobre os meros obxectivos económicos", apuntou.
Deste xeito, na misiva, o director xeral de Mobilidade expresa a súa confianza en que o operador ferroviario reformule esta decisión e valore o mantemento da atención presencial aos viaxeiros destas estacións.
Isto, segundo lembrou, xa se fixo hai dous anos, cando se atendeu as xestións realizadas polo Goberno galego e abandonouse o plan de peche destes servizos nas estacións de Sarria, A Rúa, O Barco de Valdeorras, O Carballiño, Ribadavia, Redondela e Guillarei.
